Qazaqstanda balalardy pnevmokokk juqpasyna qarsy jappaı egý bastalmaq
ASTANA. QazAqparat - 2014 jyly mamyr aıynan bastap, Astanada, Pavlodar jáne Aqtóbe oblystarynda pnevmokokk juqpasyna qarsy balalardy jappaı egý bastalady.
Bul týraly búgin Astanada QR tutynýshylardyń quqyqtaryn qorǵaý agenttigi epıdemıologııalyq qadaǵalaý departamentiniń bas sarapshysy Nurshaı Ázimbaeva málim etti.
«Salamatty Qazaqstan» memlekettik baǵdarlamasy aıasynda 2014 jyldyń mamyr aıynda Astanada, Pavlodar jáne Aqtóbe oblystarynda pnevmokokk juqpasyna qarsy balalarǵa vaktsına egý josparly jumystary atqarylatyn bolady. 2015 jyly ımmýnızatsııamen Batys Qazaqstan, Almaty oblystary men Almaty qalasy qamtamasyz etiledi», - dep atap ótti ol.
Onyń aıtýynsha, egý 2, 4 jastaǵy jáne 12-15 aılyq balalarǵa júrgiziledi.
«Pnevmokokk ınfektsııasynan saqtaý úshin (menıngıt, pnevmonııa, otıt) eki jasqa deıingi balalar ǵana emes, sonymen qatar olardyń týǵan-týystaryna, balalardyń 78 paıyzyna vaktsına egý jumystaryn júrgizý qajet. Osydan keıin aýrý taralýyn toqtatady», - deıdi maman.
Qazaqstanda 2007-2009 jyldar aralyǵynda respıratorlyq jáne pnevmonııa aýrýlarynan 1 jasqa deıingi balalardyń qaıtys bolý kórsetkishi, barlyq ólim-jitim sebebiniń arasynda 3 orynda, al ınfektsııalyq aýrýlar boıynsha 1 orynda boldy.
TMD elderi ishinde Qazaqstan pnevmokokk juqpasyna qarsy egýdi kezeń-kezeńimen engizip otyrǵan elderdiń biri. 2010 jyldyń jeltoqsanynda vaktsınatsııalaý Shyǵys Qazaqstan men Mańǵystaý oblystarynda júrgizile bastady. 2011 jyly bul tizimge Jambyl men Ońtústik Qazaqstan oblystary engizildi.
Pnevmokokk - jedel pnevmonııanyń qozdyrǵyshy (ásirese, kishkentaı balalar men qarttarda). Qanǵa túsken jaǵdaıda qozdyrǵysh mı qabyqtarynyń, ókpeniń, býynnyń jáne taǵy basqa aǵzalardyń irińdi qabynýyna alyp keledi. Balalarda jıi kezdesetin klınıkalyq túrleri - jedel orta otıt (60 paıyzǵa deıin), pnevmonııa (65-80 paıyzǵa deıin) jáne menıngıt (5-20 paıyz).
Dúnıejúzilik densaýlyq saqtaý uıymynyń derekteri boıynsha, álemde pnevmokokk ınfektsııasynan paıda bolatyn syrqattardan jylyna 1,6 mln.-nan astam adam qaıtys bolady. Sonyń ishinde 1 mln.-ǵa jýyǵy 5 jasqa tolmaǵan balalar. Al 1 jasqa tolmaǵan balalardyń shetineý úlesi 40 paıyzdy qurap otyr.
