Qazaqstanda balalardy qandaı máseleler alańdatady
ASTANA. QazAqparat - «Sange zertteý ortalyǵy» qoǵamdyq qory Qazaqstandaǵy balalardyń quqyqtaryn qorǵaý jaǵdaıyna júrgizgen táýelsiz saraptama nátıjelerin jarııalady, dep habarlaıdy QazAqparat tilshisi.
Respýblıka boıynsha júrgizilgen áleýmettik saýalnamaǵa 2577 bala qatysqan jáne olardyń 7%-y sońǵy bir jylda óz quqyqtary buzylý jaǵdaıy boldy dep esepteıdi.
Atap aıtqanda, olar sapaly medıtsınalyq qyzmet kórsetý, qorshaǵan ortanyń tazalyǵy, eńbek, ózindik pikir, zorlyq-zombylyqtan qorǵaý, bos ýaqyt pen demalýmen baılanysty quqyqtarynyń saqtalmaıtynyn jetkizgen.
«Balalardyń kópshiligi 14 jastan keıin jumys isteýge ruqsat berilmeıtinin jetkizgen. Ásirese, bul týraly aýyl balalary men turmysy tómen otbasydan shyqqan balalar jıi aıtady», - dedi «Sange zertteý ortalyǵy» QQ sarapshysy Aınagúl Sháripbaeva Astanada ótken dóńgelek ústelde.
Aıta keteıik, QR Eńbek kodeksiniń 181-shi babynda on segiz jasqa tolmaǵan qyzmetkerler úshin jumys ýaqytynyń uzaqtyǵy kórsetilgen. 14 jastan 16 jasqa deıingi balalar ata-ana kelisimimen aptasyna 24 saǵat qana jumys isteýi tıis. 16 jastan 18 jasqa deıingi qyzmetkerlerdiń jumys ýaqyty aptasyna 36 saǵattan aspaýy kerek.
Sarapshynyń aıtýynsha, keıbir óńirlerdegi balalar ózderiniń taza qorshaǵan ortada ómir súrý quqyqtary buzylyp jatyr degen pikirde.
«Qazaqstannyń batys bóligindegi munaıly ólkeler men Shyǵys Qazaqstan oblysynyń balalary «taza aýa joq, zııandy aýamen tynys alyp júrmiz» dep jaýap bergen», - dep túsindirdi A.Sháripbaeva.
Sonymen birge, balalardyń kópshiligi sóz bostandyǵynyń joqtyǵyn jáne óz pikirlerin jetkize almaıtyndaryn bildirgen.
«Bizge eshkim qulaq aspaıdy, mektepte oqý ozattarynyń ǵana pikiri eskeriledi, sóz erkindigi joq», degen jaýaptardy oqydyq. Mektep júktemesiniń kóptiginen balalardyń «Bos ýaqyt pen demalys quqyǵy» da buzylyp jatyr», - deıdi A.Sháripbaeva.
Odan bólek, saýalnama arqyly orta synyp balalary mektepte buzaqylar kóptigin, balaǵat sózderdiń kóp aıtylatynyn, turmysynyń nasharlyǵynan nemese kóriksizdiginen synyptastarynan túrli jábir kóretinderin jetkizgen.
