Qazaqstanda balalardy durys tamaqtandyrýdyń onkúndigi ótýde
ASTANA. QazAqparat - Qazaqstannyń barlyq aımaqtarynda «Durys tamaqtaný - deni saý ultty qalyptastyrýdyń kepili!» uranymen mektepte tamaqtandyrýdy uıymdastyrý jóninde onkúndik ótip jatyr. Shara 10 sáýirge deıin jalǵasady.
Sharanyń maqsaty - durys tamaqtanýdyń mańyzdylyǵy jóninde halyqtyń, ásirese mektep jasyndaǵy balalardyń saýattylyǵyn arttyrý, oqý oryndaryndaǵy oqýshylardyń densaýlyǵyn saqtaý men nyǵaıtý úshin jaǵdaı jasaýǵa yqpal etý bolyp tabylady.
«Onkúndik aıasynda respýblıkanyń alǵashqy medıtsınalyq-sanıtarlyq kómek kórsetý uıymdarynda medıtsınalyq qyzmetkerler arasynda balalardyń, onyń ishinde mektep jasyndaǵy balalardyń tamaqtaný rejımi týraly, aýrýdyń aldyn alýdaǵy durys tamaqtanýdyń mańyzdylyǵy jaıynda, tez daıarlanatyn taǵamdardyń keri áseri týraly oqytý semınar-trenıngterin ótkizý sharalary qamtylǵan»,-delingen QR Densaýlyq saqtaý jáne áleýmettik damý mınıstrligi málimetinde.
Budan bólek, bilim berý uıymdarynda «Men salaýatty ómir saltyn tańdaımyn», «Aqylmen tamaqtan», «Fast-fýd - men úshin emes» taqyryptarynda dıktanttar men baıqaýlar ótkizý; «Durys tamaqtaný pıramıdasy», «Dárýmenderge baı azyq-túlikter týraly ne bilemin?», «Fast-fýd - aǵzaǵa paıdaly ma, zııan ba?» taqyryptarynda ınteraktıvti oqytý sharalary, sondaı-aq durys tamaqtaný, ystyq tamaqtyń mańyzdylyǵy, tamaqtaný rejımin saqtaý, balalardyń boıynda tamaqtaný mádenıetin qalyptastyrý máseleleri boıynsha ata-analar jınalysyn ótkizý eskerilgen.
Mektep jasynda durys tamaqtanbaý - júrek-qan tamyrlary aýrýlary, onkologııalyq aýrýlar, semizdik pen artyq salmaq, qant dıabeti aýrýlarynyń damý qaýpin týdyryp, erte jastan múgedektikke shaldyǵý men ómir súrý uzaqtyǵyn qysqartýǵa ákeledi.
Budan buryn habarlanǵandaı, 1 sáýir kúni Astana qalasynyń medıtsına qyzmetkerlerimen kezdesýi barysynda QR Premer-Mınıstriniń orynbasary Darıǵa Nazarbaeva mektepterden tys jerlerde balalar tamaqtanatyn taǵamdardy baqylaý kerektigin tapsyrǵan bolatyn.
«Balalardyń densaýlyǵy máselesine toqtalatyn bolsaq, densaýlyq saqtaý qyzmetteri balalar bolatyn barlyq jerde, onyń ishinde mektepten tys oryndarda baqylaý júrgizýi tıis. Atap aıtqanda, býfetter men dámhanalarda satylyp jatqan taǵamdardy baıqaý kerek. Jalpy, satylatyn jáne bizdiń balalardy tamaqtandyrýǵa jiberiletin ónimderdiń sapasyna talaptardy qataıtqan durys bolady dep sanaımyn», - dedi Úkimet basshysynyń orynbasary.
