Qazaqstanda balalardy býllıngten qorǵaýda tyń qadamdary iske asyrylady

ASTANA. QazAqparat - Bilim berý uıymdarynda zorlyq-zombylyqtyń aldyn alý jónindegi vedomstvoaralyq baǵdarlama engiziledi. Bul jaıynda «Ashyq» NQA portalynda jarııalanǵan balalardy zorlyq-zombylyqtan qorǵaý, sýıtsıdtiń aldyn alý, olardyń quqyqtary men salamattyǵyn qamtamasyz etý jónindegi 2023–2025 jyldarǵa arnalǵan keshendi josparda jazylǵan, dep habarlaıdy QazAqparat tilshisi.

«Osy baǵdarlama balalarmen jumys isteıtin barlyq pedagogtardyń ádistemelik tiregi bolady. Balalar arasyndaǵy jábirleý máselesi olardyń damýyna úlken qaýip tóndiredi. Halyqaralyq tájirıbeni zerdeleý barysynda Fınlıandııanyń Kiva dep atalatyn balalar arasynda jábirleýdiń aldyn alý baǵdarlamasynyń tıimdiligi baıqaldy. KiVa - ol býllıngpen kúres boıynsha ınnovatsııalyq, nátıjeleri joǵary baǵdarlama. Baǵdarlama jumys istegen 10 jyl ishinde fın elinde balalar býllınginiń kórsetkishteri 4 ese tómendegen. Bul tájirıbe elimizdiń bilim berý júıesiniń erekshelikterin eskere otyryp zerdelenedi», - delingen qujatta.

Balalarǵa qatysty zorlyq-zombylyqtyń rezonanstyq jaǵdaılary tıisti organdarǵa áreket etýdi talap etedi, al mundaı máselelerdi sheshýde kámeletke tolmaǵandardyń isteri jáne olardyń quqyqtaryn qorǵaý jónindegi komıssııa úılestirýshi ról atqarýy tıis. Komıssııanyń qyzmetin eleýli túrde transformatsııalaý jóninde sharalar qabyldanady.

«Sonymen qatar, medıtsınalyq-áleýmettik esepke alýdy júrgizý qaǵıdalaryn ázirleý josparlanǵan. Esepke alýdyń bul túri 2019 jyly kámeletke tolmaǵandar arasyndaǵy quqyq buzýshylyqtyń aldyn alý týraly zańǵa engizildi. Ol jeke profılaktıka sharalarymen qamtylatyn adamdarǵa medıtsınalyq, psıhologııalyq, áleýmettik kómek kórsetý, beıimdeý jáne ońaltý maqsatynda júzege asyrylady. Keshendi josparda medıtsınalyq-áleýmettik esepke alýdy júrgizý Kámeletke tolmaǵandardyń isteri jáne olardyń quqyqtaryn qorǵaý jónindegi komıssııalarǵa bekitiletin bolady. Erejelerdi Oqý-aǵartý mınıstrligi ázirleıdi», - dep jazylǵan atalǵan qujatta.

Osy tyń qadamdar nátıjesinde balalar arasynda zorlyq-zombylyqqa, balalar qylmysyna, qatygezdikke jol bermeý, sondaı-aq «táýekel tobyndaǵy» otbasylardyń ál-aýqatyn arttyrý josparlanǵan.