Qazaqstanda balalardy asyrap alý, Asyrap alý jónindegi agenttikter arqyly ǵana júzege asyrylatyn bolady
ASTANA. 8 jeltoqsan. QazAqparat /Gúlmıra Alıakparova/ - Jańadan qabyldanǵan «Neke (erli-zaıyptylyq) jáne otbasy týraly» QR Kodeksi boıynsha Qazaqstanda balalardy asyrap alý,
Asyrap alý jónindegi agenttikter arqyly ǵana júzege asyrylatyn bolady. Bul týraly búgin Astanada neke jáne otbasy zańnamasyndaǵy jańashyldyqtardy talqylaýǵa arnalǵan semınar-keńeste málim boldy.
Semınardyń barysynda Parlamentte jýyrda qabyldanǵan, qoldanystaǵy barlyq normatıvti quqyqtyq aktilerdi bir zańnamalyq aktige shoǵyrlandyrýdy kózdeıtin «Neke (erli-zaıyptylyq) jáne otbasy týraly» QR Kodeksiniń erejeleri áńgime arqaýy boldy.
Jańa Kodeks boıynsha, azamattar nekege turý ótinishterin turaqty turǵylyqty jerine baılanyssyz, respýblıkanyń kez kelgen tirkeý organyna bere alady. Alǵash ret Kodekske sýrrogatty ana máselesin, balany tárbıeleýge berý boıynsha kelisim-sharttardy jasaý jáne buzý tártibin retteıtin erejeler engizildi.
Taǵy bir jańashyldyq - balalardy asyrap alý, budan bylaı Asyrap alý jónindegi agenttikter arqyly ǵana júzege asyrylatyn bolady. Agenttikter balalar quqyqtaryn qorǵaý salasyndaǵy quzyrly organynda mindetti túrde akkredıtatsııadan ótýi tıis. Kodekske sáıkes, qazaqstandyq asyrap alýshylarǵa basymdyq beriledi.
Qabyldanǵan Kodekstiń júzege asyrylýy ádilet organdarynyń AHAJ bólimderinde qamtamasyz etiletin bolady.
QR Ádilet vıtse-mınıstri Ámirhan Amanbaev málim etkendeı, búginde AHAJ qyzmeti qarqyndy damyǵan aqparattyq-kommýnıkatsııalyq salamen aıaǵyn teń alyp keledi. Máselen, 2007 jyldan bastap AHAJ qyzmetkerleri qaǵazbastylyqtan tolyǵymen arylyp, azamattyq jaǵdaılar týraly aktilerdi tirkeýdi elektrondy túrde júrgizedi. «Elekrondy úkimet» portalynda AHAJ jelisi boıynsha 11 memlekettik qyzmet kórsetiledi. Portal arqyly 2 myńnan astam elektrondy anyqtama berildi. Aǵymdaǵy jyly iske qosylǵan - nekeni tirkeý ótinishin ınternet arqyly berý qyzmetimen 50 jup qoldanyp úlgerdi. 2011 jyldyń sońyna deıin elektrondy qyzmettiń taǵy bir túri iske qosylady. Endi balany tirkeý úshin Halyqqa qyzmet kórsetý ortalyǵyna barýdyń qajeti bolmaıdy. Al 2012 jyldan bastap muraǵatty derekterdiń «E-muraǵat AHAJ» elektrondy biryńǵaı bazasy jumys isteı bastamaq.
