Qazaqstanda balalardyń tis saýlyǵyna qatysty alańdatarlyq statıstıka jarııalandy
ASTANA. KAZINFORM — Bıylǵy jyldyń alǵashqy jartyjyldyǵynda Qazaqstanda mektep jasyndaǵy balalardy tekserý kezinde tis jegisiniń 80 169 jaǵdaıy anyqtaldy. Densaýlyq saqtaý mınıstrligi balalar arasynda stomatologııalyq aýrýlardyń aldyn alý sharalaryn kúsheıtip jatyr. Bul týraly vedomstvonyń baspasóz qyzmeti málim etti.
Qazaqstan Respýblıkasy Densaýlyq saqtaý mınıstrligi mektep jasyndaǵy balalardyń arasynda aýrýlardyń erte kezeńde aldyn alý sharalaryn kúsheıtip keledi.
Mınıstrliktiń málimetinshe, bıylǵy jyldyń birinshi jartyjyldyǵynda 3,6 mln bala profılaktıkalyq medıtsınalyq qarap-tekserýmen qamtylǵan. Tekserý nátıjesinde 302 myń baladan túrli aýrýlar anyqtalyp, olardyń 119 myńnan astamy dınamıkalyq baqylaýǵa alyndy. Balalardyń arasynda jıi kezdesetin máselelerdiń qatarynda tis jegisi, qanazdyq jáne kórý qabiletiniń buzylýy bar.
2026 jyldyń birinshi jartyjyldyǵynda mektep jasyndaǵy balalardy profılaktıkalyq qarap-tekserý kezinde tis jegisiniń 80 169 jaǵdaıy anyqtaldy.
Bos qanttardy jıi tutyný — tis jegisiniń damýyna yqpal etetin negizgi taǵamdyq faktorlardyń biri. Sondyqtan onyń aldyn alý tek stomatologqa qaralýmen shektelmeıdi. Bul — kúndelikti daǵdylardyń jıyntyǵy: aýyz qýysynyń gıgıenasyn saqtaý, tátti sýsyndar men quramynda qant mólsheri joǵary ónimderdi tutynýdy azaıtý, taza aýyzsýdyń qoljetimdi bolýy jáne medıtsınalyq kómekti ýaqtyly alý.
2025 jyldan bastap bilim berý uıymdarynda balalardyń tamaqtaný ratsıonyndaǵy qant pen tuz mólsherin azaıtýdy kózdeıtin mekteptegi tamaqtanýdyń jańa standarty engizildi.
«Bolashaqqa saý tispen» jobasy sheńberinde eki jyldyń ishinde stomatologııalyq profılaktıkaǵa arnalǵan 166 kabınet ashyldy. Olardyń jumysy oqýshylardyń aýyz qýysyna kútim jasaý daǵdylaryn qalyptastyrýǵa jáne stomatologııalyq aýrýlardyń aldyn alýǵa baǵyttalǵan.
Sonymen qatar profılaktıkalyq medıtsınalyq qarap-tekserý júıesine tsıfrlyq tehnologııalar men jasandy ıntellekt quraldary engizilip otyr.
2027 jyldan bastap ata-analarǵa balalardyń aldaǵy medıtsınalyq qarap-tekserýleri týraly SMS-habarlamalar jiberý josparlanyp otyr. Bul otbasylarǵa aldyn ala eskertý alýǵa jáne qajetti tekserýlerden ýaqtyly ótýge múmkindik beredi.
Balalardyń densaýlyǵyna tónetin zamanaýı qaýip-qaterler tek medıtsına salasymen shektelmeıdi. Tamaqtaný, dene belsendiligi, uıqy, psıhologııalyq saýlyq jáne balanyń kúndelikti ýaqytynyń edáýir bóligin ótkizetin orta onyń densaýlyǵyna tikeleı áser etedi.
Osyǵan baılanysty balalardyń densaýlyǵyn saqtaý úshin densaýlyq saqtaý jáne bilim berý júıeleriniń, jergilikti atqarýshy organdardyń jáne otbasylardyń birlesken jumysy qajet.
