Qazaqstanda balalardyń tamaǵynda qanttyń táýliktik normasy 5 esege jýyq azaıtyldy
ASTANA. KAZINFORM — 2025 jyldyń 1 qyrkúıeginen mektepterde jańa Tamaqtaný standarty engiziledi. Osy oraıda ashanalarda qanty men tuzy kóp taǵamdar bolmaıtyny habarlandy.
— QR DSM Sanıtarııalyq-epıdemıologııalyq baqylaý komıtetiniń usynǵan deregine sáıkes, QR Densaýlyq saqtaý mınıstriniń 2025 jylǵy 4 naýryzdaǵy buıryǵy aıasynda bıylǵy 1 qyrkúıekten bastap bilim berý obektilerinde Jańa tamaqtaný standarty kúshine enedi. Jańa tamaqtaný standarty durys teńgerimdi tamaqtanýǵa qoıylatyn halyqaralyq talaptardy eskere otyryp, sondaı-aq Qazaq taǵamtaný akademııasy syndy tamaqtaný salasyndaǵy beıindi uıym mamandarynyń qatysýymen jáne ıÝNISEF halyqaralyq uıymynyń qoldaýymen ázirlendi, — delingen Densaýlyq saqtaý mınıstrliginiń Kazinform agenttigine bergen jaýabynda.
Qant pen tuzy kóp taǵamdardy tutyný qant dıabeti, júrek-qantamyrlary jáne onkologııalyq aýrýlar sııaqty juqpaly emes derttiń órshýine ákeledi. Osyǵan oraı, jańa standart atalǵan aýrýlarǵa tosqaýyl qoıýǵa arnalǵan.
— Jańa standart qantty tutyný deńgeıin 3,6 esege deıin, tuzdy 5 esege deıin azaıtýdy, sondaı-aq kókónister, jemister men sút ónimderin tutynýdy arttyrýǵa baǵyttalǵan. Bul turǵyda 6-dan 18 jasqa deıingi balalar úshin qanttyń táýliktik normasy jasyna baılanysty 15-21 gramm aralyǵyn quraıdy, bul qoldanystaǵy normalardan 3,3-4,7 ese az (bes rettik tamaqtaný kezinde 70 gramm bolǵan). Sondaı-aq balalardy bes ret tamaqtandyratyn mekemeler úshin tuzdyń normalary 8-den 3 gramǵa deıin, demek 2,7 ese azaıdy, — dep atalyp ótken vedomstvo aqparatynda.
Buǵan deıin Qazaqstanda tuzdy tutyný mólsheri tym joǵary ekenin jazǵan edik.