Qazaqstanda balalardyń quqyǵyn qorǵaýǵa baǵyttalǵan jańa ulttyq baǵdarlama ázirlenip jatyr
ASTANA. KAZINFORM — Halyqaralyq balalardy qorǵaý kúni qarsańynda eldegi balalardyń quqyqtaryn qorǵaý men ál-aýqatyn arttyrý baǵytynda atqarylyp jatqan sharalar talqylanyp jatyr. Osy jumys aıasynda Oqý-aǵartý vıtse-mınıstri Edil Sabyruly Ospanov mınıstirliktiń jumysy jaıly baıandady.
Vıtse-mınıstrdiń aıtýynsha, Memleket basshysynyń IV Ulttyq quryltaıda bergen tapsyrmasy aıasynda Balalar quqyqtary jónindegi ýákilmen, Parlament depýtattarymen jáne qoǵam ókilderiniń qatysýymen «Qazaqstan balalary» biryńǵaı baǵdarlamasyn ázirleý baǵytynda keshendi jumystar júrgizilip jatyr.
— Baǵdarlamanyń qurylymynda kelesi negizgi baǵyttar qamtylady sapaly bilimge qol jetkizý, balalardyń densaýlyǵyn nyǵaıtý, otbasylardy áleýmettik qorǵaý jáne qoldaý, balalar qaýipsizdigi, sport pen shyǵarmashylyqqa tartý, qoǵamdyq ómirge belsendi aralastyrý, otbasy rólin kúsheıtý, sanaly ata-ana men jaýapty áke bolýdy qoldaý sııaaqty negizgi baǵyttar qamtylady, - dedi vıtse-mınıstr.
«Qazaqstan balalary» biryńǵaı baǵdarlamasy ár balaǵa teń múmkindik berýdi, olardyń quqyqtaryn qorǵaý men jan-jaqty qoldaý kórsetýdi kózdeıtin turaqty memlekettik saıasattyń irgetasy bolmaq.
Sondaı-aq Edil Ospanov 2024 jylǵy 1 qańtardan bastap Ulttyq qordyń ınvestıtsııalyq tabysynyń 50 paıyzy 18 jasqa deıingi qazaqstandyq balalardyń jeke shottaryna avtomatty túrde aýdarylyp jatqanyn atap ótti.
Máselen, 2024 jyly ár balaǵa 100 AQSh dollarynan, al 2025 jylǵy esep boıynsha 129 dollardan kelip otyr. Sonymen qatar, alýshylar sany da artyp keledi 2024 jyly bul baǵdarlama aıasynda 304 815 bala, 2025 jyly 324 430 bala qamtylǵan.
Budan bólek, vıtse-mınıstr sapaly bilim alýǵa múmkindik beretin qosymsha tetik retinde «Keleshek» erikti jınaq jobasy iske asyrylyp jatqanyn jetkizdi. Bul joba memlekettik bilim grantyna qosymsha qarajat jınaýǵa, jastardyń laıyqty mamandyq meńgerýine nemese turǵyn úı máselesin sheshýge múmkindik beredi.
Sondaı-aq elimizdegi bastaýysh synyp oqýshylaryn qoldaý maqsatynda 1-4 synyp oqýshylaryna tegin ystyq tamaq berý júıesi keńeıtilip otyr. Bul shara 25 myńnan astam balany qamtydy.
— Bilim berý mekemelerinde mektep ashanalaryna arnalǵan jańa standarttar daıyndaldy. Densaýlyq saqtaý mınıstrligimen birlesip bekitilgen bul standarttar 1 qyrkúıekten bastap elimizdiń barlyq mektepterinde engiziledi. Ratsıondy jańartýmen qatar, tamaqtyń sapasy men qaýipsizdigin, ashanalardyń sanıtarlyq jaǵdaıyn baqylaý sharalary da kúsheıtiledi, — dedi Edil Ospanov.
Buǵan deıin habarlanǵandaı, bıyl ár balaǵa ınvestıtsııalyq tabystyń 50 paıyzy 129 dollar aýdarylyp jatyr.