Qazaqstanda balalardyń quqyqtaryn qorǵaý jónindegi alǵashqy basqarma quryldy

ASTANA. KAZINFORM — Astanada ótip jatqan jyl saıynǵy Respýblıkalyq tamyz konferentsııasy aıasyndaǵy paneldik sessııalarda elimizdegi Balalardyń quqyqtaryn qorǵaý jónindegi alǵashqy basqarmanyń Aqtóbe oblysynda qurylǵany týraly habarlandy.

Eske salaıyq, basqarmalardy qurý – qorǵanshylyq jáne qamqorshylyq organdarynyń jumysyn kúsheıtýge baǵyttalǵan reformanyń bir bóligi. Jańa basqarmalar balalardyń quqyqtary men múddelerin qorǵaýda negizgi býynǵa aınalady. Olardyń mindeti – ótinishterge jedel áreket etý, otbasylarǵa kómek kórsetý jáne óńirdegi bala ál-aýqatyna jaýapty barlyq qyzmetterdiń jumysyn úılestirý.

Jergilikti atqarýshy organdardyń bazalyq qurylymyna Balalardyń quqyqtaryn qorǵaý basqarmasyn qurýdy kózdeıtin ózgerister engizildi. Basqarmaǵa oblystyq jáne respýblıkalyq mańyzy bar qalalar men aýdandardaǵy balalardyń quqyqtaryn qorǵaý bólimderi, sondaı-aq elordadaǵy tıisti bólimder baǵynady.

«Biz ár balanyń senimdi qorǵalýyn qamtamasyz etetin júıe quryp jatyrmyz. Bul máselelerdi jedel sheshýge jáne balalarǵa jergilikti deńgeıde kómek kórsetýge múmkindik beredi», – dedi QR Oqý-aǵartý mınıstrligi Balalardyń quqyqtaryn qorǵaý komıtetiniń tóraıymy Nasymjan Ospanova.

Atalǵan bólimshelerdiń tıimdi jumys isteýi úshin Oqý-aǵartý mınıstrligi zańnamalyq deńgeıde norma bekitti – qorǵanshylyq jáne qamqorshylyq organynyń bir mamany 5 myń balaǵa qyzmet kórsetedi. Sonyń nátıjesinde bıylǵy jyldyń basynan beri jergilikti deńgeıdegi qyzmetkerler sany 303-ten 896-ǵa ósti. Olar úshin oqytý kýrstary uıymdastyrylyp, biryńǵaı jumys standarttary engizilýde.

Joba QR Bala quqyqtary jónindegi ýákilmen birlesip júzege asyrylýda jáne elimizdiń barlyq óńirlerinde kezeń-kezeńimen engiziletin bolady.

Aıta keteıik, Ǵanı Beısembaev Jambyl oblysynda quldyqqa túsken balalarǵa qatysty pikir bildirdi.