Qazaqstanda balalardy qosymsha bilimmen qamtý deńgeıi 90 paıyzǵa jetti
ASTANA. KAZINFORM — 2025 jyldyń qorytyndysy boıynsha Qazaqstanda balalardy qosymsha bilimmen qamtý deńgeıi 90 paıyzǵa jetip, 3,5 mln balany qurady. Onyń ishinde 2,2 mln oqýshy tegin úıirmelerge qatysqan. Bul týraly Oqý-aǵartý mınıstrligi málimdedi.
Vedomstvo dereginshe, qosymsha bilim berý uıymdarynyń jelisi bir jylda 25 paıyzǵa ulǵaıyp, eki myńnan astam nysanǵa jetken. Aýyldyq jerlerdegi balalardy qosymsha bilimmen qamtý maqsatynda 1 000 komıýnıtı-ortalyq qurý jumystary aıaqtalǵan. Sońǵy úsh jylda 4 200-den astam balany qamtıtyn 1 251 ortalyq ashylǵan.
- 2025 jyldyń maýsym aıynan bastap sport, shyǵarmashylyq jáne qosymsha bilim berý baǵyttaryn biriktiretin biryńǵaı vaýcher júıesi pılottyq rejımde iske qosyldy. Qazirgi tańda 600 myńnan astam bala qosymsha bilim alýǵa vaýcher alǵan. Joba Astana jáne Shymkent qalalarynda, sondaı-aq Qaraǵandy, Aqtóbe, Atyraý jáne Qyzylorda oblystarynda júzege asyrylyp jatyr, - delingen aqparatta.
«Oqýǵa qushtar ult» jobasy aıasynda mektep kitaphanalaryn damytý jumystary jalǵasyn tapty. edu.bookfund.gov.kz portalyna 8 myńnan astam mektep pen kolledj qosylyp, oqyrman belsendiligi 26,2 paıyzǵa artqan. 2025 jyly mektep kitaphanalarynyń qory 141 mln danaǵa jetti. Sonymen qatar 1 830 kovorkıng-ortalyq ashý arqyly bilim berý uıymdaryndaǵy kitaphanalardyń materıaldyq-tehnıkalyq bazasy jaqsartylǵan.
2025-2026 oqý jylynda bilim berý uıymdarynda «Adal azamat» birtutas tárbıe baǵdarlamasy iske asyrylyp jatyr. Baǵdarlama «Zań jáne tártip», «Eńbek adamy» jáne «Taza Qazaqstan» atty úsh negizgi ıdeıaǵa negizdelgen. Tárbıe jumystary alty negizgi qundylyqty qamtıdy: táýelsizdik pen otanshyldyq, birlik pen yntymaq, ádildik pen jaýapkershilik, zań men tártip, eńbekqorlyq pen kásibılik, jasampazdyq pen jańashyldyq.
Baǵdarlama sheńberinde elimizdiń barlyq mektepterinde ata-analarǵa pedagogıkalyq qoldaý kórsetý ortalyqtary jumys istep tur. Ortalyqtardyń negizgi maqsaty — bala tárbıesi men oqytýda otbasy men mekteptiń ózara yntymaqtastyǵyn kúsheıtý jáne pozıtıvti ata-ana mádenıetin qalyptastyrý. Mınıstrlik málimetinshe, 2025 jyly ata-analardyń mektep ómirine qatysý belsendiligi eki esege artqan. Ata-analarǵa arnalǵan sabaqtarǵa qatysqandardyń 62 paıyzy tárbıe protsesine ózgeris engizýge daıyn ekenin bildirgen.
Muǵalimder arasynda júrgizilgen saýalnama nátıjesi boıynsha, respondentterdiń 82 paıyzy baǵdarlamanyń synyp jetekshileriniń kásibı damýyna oń áser etkenin, 84 paıyzy oqýshylardyń belsendiligi artqanyn, al 71 paıyzy mektep pen otbasy arasyndaǵy ózara yntymaqtastyqtyń kúsheıgenin atap ótken.
Aıta keteıik, Aqtóbede qysqy demalysta oqýshylarǵa úıirmeler uıymdastyrylady.