Qazaqstanda balalardaǵy aýyr epılepsııany emdeýdiń jańa tásili engizildi
ASTANA. QazAqparat - «Ulttyq neırohırýrgııa ortalyǵy» AQ basshysy Serik Aqsholaqov balalardaǵy aýyr epılepsııany emdeýdiń jańa tásili týraly aıtyp berdi, dep habarlaıdy QazAqparat tilshisi.
«Gemısferotomııa - bas mıynyń jarty sharyn almaı-aq, mı qabyǵynyń eń az bóligin alý arqyly ótkizgish joldardy qıylystyrý. Sımptomdyq epılepsııanyń alýan túrleriniń arasynda mı jarty sharynyń tutas nemese azdaǵan bóliginiń zaqymdanýynan sińir tartylyp, qurysatyn jaǵdaılar bar. Mundaı naýqastar salystyrmaly túrde az jáne olardyń basym bóligi - balalar. Epılepsııany hırýrgtyq jolmen emdeýdiń bul túri kóbinese kúrdeli formalarda qoldanylady», - dedi Serik Aqsholaqov QazAqparat tilshisine bergen suhbatta.
Onyń aıtýynsha, bul emdeý syrqatty aýyr túrde ótkeretin, jıi ustamaǵa tap bolatyn naýqastarǵa paıdaly bolmaq.
«Mundaı jıi ustamalar naýqastardyń ómirine qaýip tóndiredi, al qurysýǵa qarsy uzaq emdeý men epılepsııalardyń jıi bolýy psıhomotorly damýdyń óreskel buzylýyna ákep soǵady. Mundaı naýqastarda jıi epılepsııadan bólek, tereń gemıparez (deneniń oń nemese sol jaǵy bulshyqetteriniń qozǵalmaýy), mıdyń saý bólikterine zaqym kelý bar. Zaqymdalǵan jarty shar eshqandaı ról atqarmaıdy», - dep atap ótti dáriger.
Sondyqtan, zaqymdalǵan jartyshardyń bóligin alyp tastaý (gemısferotomııa) emdeýdiń eń tıimdi jáne senimdi ádisi bolyp sanalady. Munda zaqymdalǵan mı qabyǵy alynbaıdy, tek qalǵan mıdan oqshaýlanady. Osy arqyly gemısferotomııa mı bóligin alýdaǵy ózge hırýrgııalyq tásilderden erekshelenedi. Bul otanyń maqsaty - mıdyń bir jartysyndaǵy patologııalyq elektrlik ımpýlstardy ózge bóligine taratpaý.
«Osylaısha, bul tehnologııany engizý elimizdegi halyq densaýlyǵyn jaqsartýǵa, múgedektikti azaıtýǵa, QR halqyna medıtsınalyq kómek kórsetý deńgeıi men halyqaralyq mártebesin kóterýge baǵyttalyp otyr», - dep sanaıdy maman.
Aıta keteıik, Ulttyq neırohırýrgııa ortalyǵy Memleket basshysy Nursultan Nazarbaevtyń tapsyrmasymen 2008 jyly ashyldy. Munda jyl saıyn júıke júıesiniń asa kúrdeli patologııasy bar naýqasqa ota jasalady.
On jylda ortalyq mamandary 37 myńnan astam naýqasty emdep shyǵarǵan jáne 25 myńǵa jýyq ota jasap, 66 jańa neırohırýrgııalyq tehnologııalar engizgen.
2012 jyly qazaqstandyq ortalyq Shveıtsarııa óndiris pen jańa tehnologııalarǵa qoldaý kórsetý agenttiginiń bastamasymen bekitilgen medıtsına salasyndaǵy «Sapa úshin eýropalyq Gran-prı» marapatyn alǵan.
Avtor:Damır Baımanov
