Qazaqstanda balalar zııandy kompıýterlik oıyndardan qorǵalady
ASTANA. QazAqparat - QR Parlamentinde Qazaqstanda balanyń damýyna zardap tıgizetin aqparattan qorǵaýdy kózdeıtin zań jobalary tanystyryldy, dep habarlaıdy QazAqpart.
«Balalardy densaýlyǵy men damýyna zardabyn tıgizetin aqparattan qorǵaý týraly» jáne «Qazaqstan Respýblıkasynyń keıbir zańnamalyq aktilerine balalardyń densaýlyǵy men damýyna zardabyn tıgizetin aqparattan qorǵaý máseleleri boıynsha ózgertý men tolyqtyrýlar engizý týraly» zań jobalarynyń tanystyrylymyn ótkizip jatyrmyz. Osy zań jobalaryna Parlamenttiń bir top depýtaty bastamashylyq etti. Zańnamanyń dıdary ózgerdi, damý qarqyny alapat. Aqparattyń tasqyny kezeńinde onyń zardabynan balalardy, jas urpaqty qorǵaýdyń mańyzdylyǵy kún tártibine shyǵyp otyr», - dedi Májilis depýtaty Bekbolat Tileýhan tanystyrylym barysynda.
Onyń sózine qaraǵanda, zań jobasynyń memlekettiń «balany qalypty damýyna zardabyn tıgizetin aqparat pen materıaldardan qorǵaýdyń tıisti qaǵıdalaryn» ázirleýdi qamtamasyz etý mindetterin saqtaýyna yqpal etýge, sondaı-aq balanyń óziniń quqyqtaryna, atap aıtqanda «aqparat pen kez kelgen túrdegi ıdeıany izdeý, alý, berý bostandyǵyna» qajetti shekteýlerdi belgileýge arnalǵan.
«Zań jobasynyń mindeti balalardy fızıkalyq jáne psıhıkalyq densaýlyǵyna, ımandylyq, rýhanı, psıhıkalyq, fızıkalyq jáne áleýmettik jaǵynan damýyna zardabyn tıgizetin aqparattan, onyń ishinde zorlyq-zombylyq pen qatygezdikti, pornografııany, qoǵamǵa jat ári quqyq buzýshylyq áreketti nasıhattaıtyn baspa, dybys pen beıne ónimderin, elektrondyq jáne kompıýterlik oıyndardy taratýdan qorǵaýdyń uıymdastyrýshylyq-quqyqtyq tetikteri men zańnamalyq kepildikterin engizý bolyp tabylady. Osy oraıda álemniń jetekshi elderiniń tájirıbesi eskerilip otyr», - dep naqtylady B.Tileýhan.
Atap aıtqanda, ilespe zańnyń jobasynda QR Ákimshilik quqyq buzýshylyq týraly kodeksi men «Qazaqstan Respýblıkasyndaǵy balanyń quqyqtary týraly», «Bilim týraly» jáne « Ruqsattar jáne habarlamalar týraly» Qazaqstan zańdaryna ózgerister men tolyqtyrýlar engizý kózdelgen.
Zań jobasynda balalarǵa tyıym salynǵan aqparattyq ónimdi kámeletke tolmaǵandarǵa taratqany, balalardy densaýlyǵy men damýyna zardabyn tıgizetin aqparattan qorǵaý týraly zańnamany buzǵany úshin ákimshilik jaýaptylyqty belgileý kózdeledi.
