Qazaqstanda balalar Youtube-ti kórmeıtin bolady
ASTANA. QazAqparat - Qazaqstanda balalarǵa Youtube pen áleýmettik jelilerge kirýge shekteý engizilýi múmkin, dep habarlaıdy QazAqparat
«Qazirgi kezde baılanys operatorlarymen balalarǵa arnalǵan paketterdi ázirleý qarastyrylýda. ıAǵnı bul turǵyda belgili bir jas sanatyna qaraı balalarǵa qoljetimdi bolatyn aqparattyń «aq tizimi» jasalady. Operatorlar bul tujyrymdamany pysyqtaýda. Menińshe, jaqyn aralyqta bul bastamany iske asyramyz»,-dedi QR Aqparat jáne kommýnıkatsııalar mınıstrligi komıteti tóraǵasynyń orynbasary Mıhaıl Komıssarov balanyń damýyna zardap tıgizetin aqparattan qorǵaýdy kózdeıtin zań jobasyn tanystyrý barysynda depýtattar saýalyna jaýap bergen kezde.
Onyń sózine qaraǵanda, bul paket búginde jumys istep turǵan «ata-analar baqylaýy» qyzmetinen bólek iske qosylady. «Búginde baılanys operatorlarymen birge balalarǵa, mektep oqýshylaryna arnalǵan paketterdi usynýdy qarastyrýdamyz. Onda aqparat tıisti deńgeıde súzgiden ótedi. ıAǵnı, balalar paketinde áleýmettik jeliler, Youtube bolmaýy tıis dep paıymdaımyz nemese onda aldyn ala balalar úshin tazartylǵan Kaztube qamtylýy tıis. Bul rette jetkinshekterge laıyqty bilim berý men oıyn resýrstary eskeriledi»,-dedi ol.
Aıta keteıik, Májiliste «Balalardy densaýlyǵy men damýyna zardabyn tıgizetin aqparattan qorǵaý týraly» jáne «Qazaqstan Respýblıkasynyń keıbir zańnamalyq aktilerine balalardyń densaýlyǵy men damýyna zardabyn tıgizetin aqparattan qorǵaý máseleleri boıynsha ózgerister men tolyqtyrýlar engizý týraly» zań jobalary tanystyryldy.
«Osy zań jobalaryna Parlamenttiń bir top depýtaty bastamashylyq etti. Zańnamanyń dıdary ózgerdi, damý qarqyny alapat. Aqparattyń tasqyny kezeńinde onyń zardabynan balalardy, jas urpaqty qorǵaýdyń mańyzdylyǵy kún tártibine shyǵyp otyr», - dedi Májilis depýtaty Bekbolat Tileýhan tanystyrylym barysynda.
«Zań jobasynyń mindeti balalardy fızıkalyq jáne psıhıkalyq densaýlyǵyna, ımandylyq, rýhanı, psıhıkalyq, fızıkalyq jáne áleýmettik jaǵynan damýyna zardabyn tıgizetin aqparattan, onyń ishinde zorlyq-zombylyq pen qatygezdikti, pornografııany, qoǵamǵa jat ári quqyq buzýshylyq áreketti nasıhattaıtyn baspa, dybys pen beıne ónimderin, elektrondyq jáne kompıýterlik oıyndardy taratýdan qorǵaýdyń uıymdastyrýshylyq-quqyqtyq tetikteri men zańnamalyq kepildikterin engizý bolyp tabylady. Osy oraıda álemniń jetekshi elderiniń tájirıbesi eskerilip otyr», - dep naqtylady B.Tileýhan.
