Qazaqstanda balalar úıleriniń tárbıelenýshileri jappaı medıtsınalyq tekserýden ótýde
ASTANA. QazAqparat - Qazaqstanda balalar úıleriniń 2 myńnan astam tárbıelenýshisi zamanaýı tehnologııalardyń kómegimen tereńdetilgen medıtsınalyq tekserýden ótkizilýde. Bul týraly QR Bilim jáne ǵylym mınıstrliginen málim etti, dep habarlaıdy QazAqparat.
Atap ótilgendeı, QR BǴM Balalardyń quqyqtaryn qorǵaý komıtetiniń bastamasymen 2018 jylǵy maýsym aıynan bastap qamqorlyqtaǵy balalardyń densaýlyǵyn baqylaýdyń jańa formaty engizilýde. Búginde Astana men Almaty qalalaryndaǵy, sondaı-aq Aqmola, Almaty jáne Qaraǵandy oblystaryndaǵy 31 balalar úıindegi 2 myńnan astam tárbıelenýshi medıtsınalyq zertteýden ótkizilýde. Shara «Asar - Bereke» qoǵamdyq qory, «Degdar» gýmanıtarlyq qory» korporatıvtik qory jáne «Qazaqstan-Reseı medıtsınalyq ýnıversıteti» mamandarynyń qatysýmen qaıyrymdylyq aktsııa sheńberinde uıymdastyrylyp otyr.
Tereńdetilgen medıtsınalyq tekserýmen jyl sońyna deıin respýblıkadaǵy barlyq balalar úıleriniń tárbıelenýshilerin qamtý josparlanǵan.
«Joǵary bilikti dárigerler kóshpeli medıtsınalyq keshenderdiń kómegimen tárbıelenýshilerdi tereńdetilgen medıtsınalyq zertteýden ótkizýde. Onyń sheńberinde balalar men pedagogtar pedıatr, oftalmolog, psıhıatr, hırýrg jáne basqa da salalyq mamandardan keńes alýda. Dárigerlik brıgadalar atalǵan zertteýlerdi jyl ishinde respýblıka boıynsha balalar úılerinde josparlap otyr. Sozylmaly aýrýlar balalyq shaqta paıda bolatynyn eskersek, medıtsınalyq zertteýlerdiń erte jasta ótkizilýi óte mańyzdy. Medıtsınalyq zertteýler aýrýdyń asqynýyn jáne onyń odan ári ýshyǵýyn boldyrmaýǵa múmkindik beredi. Barlyq balalar júrek-qan tamyr jáne endokrındi júıeler, qursaq qýysy jáne ózge de aǵzalardyń zertteýinen ótti», - delingen mınıstrlik aqparatynda.
Zertteýlerdiń nátıjesi boıynsha tárbıelenýshilerdiń densaýlyǵy týraly aqparat Jetim balalar men ata-anasynyń qamqorlyǵynsyz qalǵan balalar respýblıkalyq derekter qorynda kórsetiletin bolady.
