Qazaqstanda balalar úıleri janynda tuńǵysh ret baqylaý keńesteri qurylady
ASTANA. QazAqparat - Qazaqstandaǵy balalar úıleri janynda alǵash ret baqylaý keńesteri qurylady. Mundaı tujyrymǵa QR Bilim jáne ǵylym mınıstrliginde kelip otyr. Baqylaý keńesteri osy jyldyń birinshi toqsanynda ashylmaq.
Baqylaý keńesteri balalar úıleriniń qyzmetterine qoǵamdyq baqylaý júrgizedi. Keńester quramdary qoǵamdyq uıymdardyń, balalar quqyǵyn qorǵaý qorlarynyń, asyrap alýshy ata-analar qaýymdastyǵynyń, memlekettik basqarý organdarynyń (onyń ishinde quqyq qorǵaý organy) ókilderinen quralmaq. Osylaısha, qoǵam balalar úıleriniń tynys-tirshiline etene qatysyp, jaǵdaıdy baqylap, balalar quqyqtaryn buzý áreketteriniń aldyn alady.
QR BǴM baspasóz qyzmetinen habaralaǵandaı, baqylaý keńesterine birqatar ókilettilik joldanady. Mysal úshin, keńesterge balalar úıleriniń qyzmeti jaıly esepterdi tyńdaýǵa, balalar úıleriniń basshylyǵynyń is-áreketterin qadaǵalaýǵa, balalardyń jaǵdaıyn derbes baǵalap, olarmen áńgimelesýge múmkindik beriledi. Baqylaý keńesteriniń atqarǵan jumystary jaıly aqparat Internet-resýrstarda, onyń ishinde balalar úıleri men QR BǴM Balalar quqyǵyn qorǵaý Komıtetiniń resmı saıtarynda jarııalanady.
QR BǴM-niń oıynsha, baqylaý keńesteriniń qurylýy balalar úıleriniń qyzmetin jaqsartyp, qoǵam úshin jarııaly eteri sózsiz. Bul osy kúnge deıin jabyq mekemeler retinde sanalyp, jaǵymsyz, tipti keı kezderi zańsyz áreketterge jol berilgen balalar úıleriniń qyzmetine oń áserin tıgizip, qoǵamdyq qadaǵalaýdy kúsheıteri anyq.
Jyl saıyn Qazaqstanda ata-ana qamqorlyǵynsyz qalǵan balalar sany azaıýda. Bul - óz otbasyna bala tárbıeleýge yqylas bildirgen ata-analar sanynyń ósýinen týyndap otyrǵan nátıje. Elimizde kóp jyldan beri alǵash ret jetim balalar sanynyń tómendeýine baılanysty balalar úıi jabyla bastady. 2015 jyldan bastap 48 jetimder úıi jabyldy (jalpy sany 188-den 140-qa deıin azaıdy).
Otbasylyq forma tájirıbesin keńeıtý maqsatynda 2016 jyldyń 9 sáýirinde elimizdiń keıbir zańnamalyq aktilerine balanyń quqyqtaryn qorǵaý máseleleri boıynsha ózgerister men tolyqtyrýlar engizilýi nátıjesinde jetim jáne qamqorshysyz qalǵan balalarmen qarym qatynas jasaýdyń jańa múmkinshilikteri - asyrap alýshy otbasy, sondaı-aq, balalardy demalys jáne mereke qúnderi januıaǵa tartatyn - qonaqtyq otbasy sııaqty jańa formalar engizildi. Bul qazaqstandyq otbasylardyń qamqorshylyq belsendiligin arttyrýǵa basty sebep boldy. Sonymen qatar, jetim jáne ata-ana qamqorlyǵynsyz qalǵan balalar týraly men balalardy asyrap alǵysy keletin januıalardyń respýblıkalyq málimetter bazalary qurylyp, óz jumysyn belsendi atqaryp jatyr.
Atqarylyp jatqan sharalardyń barlyǵy, onyń ishinde balalar úıleriniń janynda baqylaý keńesterin qurý da, balalardyń ómir súrý sapasyn meılinshe jaqsartýǵa, quqyqtaryn qorǵaýǵa jáne qoǵamnyń nazaryn ata-ana qamqorlyǵynsyz qalǵan balalar máselelerine kóbirek aýdarýǵa baǵyttalyp otyr.
