Qazaqstanda balalar uıymdarynda sanıtarııalyq baqylaý tártibi ózgeredi

ASTANA. KAZINFORM – Qazaqstanda balalarǵa arnalǵan uıymdarda sanıtarııalyq memlekettik baqylaý qaǵıdalary ózgerýde, dep habarlaıdy Densaýlyq saqtaý mınıstrligi.

2026 jylǵy 1 aqpannan bastap mektepterde, balabaqshalarda, balalar lagerlerinde jáne ózge de balalar uıymdarynda baqylaýdyń jańa tártibi engiziledi. Basty maqsat – ár bala úshin qaýipsiz, saý jáne qolaıly orta qalyptastyrý.

Jańa júıege sáıkes josparly tekserýler eki sanat boıynsha júrgiziledi: joǵary qaýip toby – keminde jarty jylda bir ret, tómen qaýip toby – jylyna bir retten artyq emes. Tekseriletin uıymdardyń tizimderi ashyq jarııalanyp, ata-analar men qoǵam baqylaý barysyn kóre alady.

Monıtorıngtiń jańa formaty buzýshylyqtardy jedel anyqtaýǵa múmkindik beredi. Mektepterdiń oqý jylyna, lagerlerdiń jazǵy maýsymǵa jáne medıtsınalyq mekemelerdiń epıdemııalyq synaqtarǵa daıyndyǵy Memleket basshysy, Úkimet jáne Densaýlyq saqtaý mınıstrliginiń tapsyrmalary boıynsha baǵalanady.

Mańyzdy ózgeris – alǵashqy tekserýde aıyppul qoldanylmaıdy. Uıymdarǵa anyqtalǵan olqylyqtardy túzetýge ýaqyt beriledi.

Sondaı-aq sanıtarııalyq dárigerlerdiń ókilettikteri keńeıtiledi. Bas memlekettik sanıtarııalyq dárigerler júıeli buzýshylyqtardy joıýdy talap ete alady, nusqamalardy jergilikti jáne ortalyq organdarǵa jiberýge quqyly, sondaı-aq mekemelerge qaýipsizdik standarttaryn jaqsartýda ádistemelik qoldaý kórsetedi.

4 jeltoqsanda Memleket basshysy «Qazaqstan Respýblıkasynyń keıbir zańnamalyq aktilerine mádenıet, bilim, otbasy jáne memlekettik baqylaý máseleleri boıynsha ózgerister men tolyqtyrýlar engizý týraly» Zańǵa qol qoıdy.

Qazirgi ýaqytta zańnyń tolyq oryndalýyn qamtamasyz etetin zańǵa táýeldi aktiler ázirlenip jatyr.

Aıta keteıik, Petropavlda qurt-qumyrsqa tabylǵan mektep ashanasyna ata-analar boıkot jarııalady.