Qazaqstanda balalar úıi tárbıelenýshileriniń ómiri týraly hıkaıa túsiriledi
ASTANA. QazAqparat - «Qazaqstan» Respýblıkalyq telearnasynyń tapsyrysy boıynsha «Kórkem fılm» kınokompanııasy «Armandar oryndalady» degen jumys ataýymen jańa qazaqstandyq hıkaıa túsiredi. Ol balalar úıi tárbıelenýshileriniń ómiri týraly syr shertedi, dep habarlady ulttyq telearnanyń baspasóz qyzmeti.
64 serııaly hıkaıanyń túsirilimderi 1 shilde kúni bastalady. Telenovellany túsirýshi - qazaqstandyq rejısser jáne stsenarıst Rashıd Súleımenov.
«Kórkem fılm» kınokompanııasy telehıkaıanyń basty jáne qosymsha rolderin somdaýǵa qosymsha kastıng jarııalaıdy. Onyń bir ereksheligi sol, kastıngke balalar úıiniń tárbıelenýshileri qatysyp, telehıkaıadaǵy basty jáne epızodtaǵy rólderdiń birin somdaýǵa múmkindik alady.
Hıkaıada «Jasóspirimder úıinde» tárbıelenip otyrǵan tárbıelenýshilerdiń ómiri jáne úlken ómirge jasaǵan alǵash qadamdary týraly baıandalady. Olardyń barlyǵy qýanysh pen qaıǵyny, alǵashqy mahabbat, dostyq pen satqyndyqty bastarynan keshiredi. Biraq olar jalǵyz emes. Bozbalalar men boıjetkenderdi ata-anasy men týǵandarynyń ornyn basqan joldastary, ustazdary jáne tárbıeshileri qoldap otyrady.
Ótinishterdi qabyldaý 14 maýsym, ıaǵnı jeksenbi kúni aıaqtalady. Kandıdattardy irikteý 15 jáne 16 maýsym kúnderi «Kórkem fılm» kınokompanııasynyń keńsesinde ótedi. Tolyq aqparatty myna telefon boıynsha alýǵa bolady: + 7 771 581 93 93.
Mindetti sharttar: qazaq tilin bilý, akterlik sheberlikti meńgerý.
Sýreti bar túıindeme myna mekenjaı boıynsha qabyldanady: korkemfilm@list.ru.
