Qazaqstanda balalar sýdıasy, prokýrory men tergeýshisi bolady
ASTANA. QazAqparat - Qazaqstanda balalar sýdıasy, prokýrory men tergeýshisi ınstıtýtyn engizý máselesi pysyqtalyp jatyr. Bul týraly búgin Májiliste ótken jylǵy jumysy jaıynda depýtattarǵa esep bergen Qazaqstannyń Bala quqyqtary jónindegi ýákili Zaǵıpa Balıeva aıtty, dep habarlaıdy QazAqparat tilshisi.
«Balalar kodeksin ázirleýge kiristik. Bizde kámeletke tolmaǵandar isi jónindegi sottar bar. Bas prokýratýra, Joǵarǵy sot jáne Іshki ister mınıstrligimen birlesip, qazirgi ýaqytta balalar sýdıasy, balalar prokýrory jáne balalar tergeýshisi bolýy úshin jumys jasap jatyrmyz. Bul baǵdarlama árbir memlekettik organǵa qazirdiń ózinde jartylaı engizilgen. Qazir ony tek jaqsartyp, naqtylaý ústindemiz», - dedi Zaǵıpa Balıeva.
Osy rette ol elimizdiń joǵary oqý oryndary balalarmen arnaıy jumys isteıtin tergeýshilerdi, prokýrorlardy, zańgerler men sýdıalardy daıyndaý isine den qoıatyndyǵyna úmit artatyndyǵyn atap ótti.
«Óıtkeni, bala men eresek adam - bul múldem bólek eki sýbekti. Balaǵa barynsha nazar aýdarý jáne mol bilim kerek. Búginde Sot akademııasynda, Quqyq qorǵaý organdary akademııasynda turaqty kýrs engizilýde. Ol bala quqyǵy jónindegi quqyq qorǵaý organdarynyń barlyq qyzmetshileri úshin mindetti bolady», - dedi Qazaqstannyń Bala quqyqtary jónindegi ýákili.
