Elimizde balalar semizdigi qaı óńirlerde jıi tirkeledi
ASTANA. KAZINFORM – Qazaqstanda balalar men jasóspirimder arasynda semizdik kórsetkishi Shyǵys Qazaqstan, Mańǵystaý, Qostanaı, Atyraý, Qaraǵandy jáne Abaı oblystarynda, sondaı-aq Almaty men Shymkent qalalarynda respýblıkadaǵy ortasha deńgeıden joǵary. Bul týraly QR Densaýlyq saqtaý mınıstrligi Kazinform agenttiginiń resmı saýalyna bergen jaýabynda málim boldy.
Mınıstrliktiń málimetinshe, artyq salmaq pen semizdik ásirese mektep jasyndaǵy balalar men jasóspirimder arasynda jıi kezdesedi. Buǵan tamaqtaný daǵdysynyń ózgerýi, qımyl-qozǵalystyń azaıýy, oqý júktemesiniń kóbeıýi jáne tsıfrlyq qurylǵylardy uzaq paıdalaný áser etedi.
2025 jylǵy medıtsınalyq statıstıka boıynsha, 0–14 jas aralyǵyndaǵy balalar arasynda semizdik alǵash ret 100 myń balaǵa shaqqanda 36,9 jaǵdaıdan anyqtalǵan. Bul kórsetkish 2023 jyly 40,5, 2024 jyly 42,6 bolǵan.
15–17 jas aralyǵyndaǵy jasóspirimder arasynda semizdik alǵash ret 100 myń turǵynǵa shaqqanda 82,1 jaǵdaıdan tirkeldi. Bul kórsetkish 2023 jyly 76,1, al 2024 jyly 95,5 bolǵan.
– Óńirlik bóliniste balalar arasyndaǵy semizdik kórsetkishi Shyǵys Qazaqstan, Mańǵystaý, Qostanaı, Atyraý, Qaraǵandy jáne Abaı oblystarynda, sondaı-aq Almaty men Shymkent qalalarynda respýblıka boıynsha ortasha deńgeıden joǵary, – delingen mınıstrlik jaýabynda.
Eske salaıyq, buǵan deıin Dúnıejúzilik semizdik federatsııasy tıimdi aldyn alý sharalary qabyldanbasa, 2040 jylǵa qaraı álemde 220 mıllıonnan astam bala semizdikke shaldyǵýy múmkin ekenin eskertken edi.
