Qazaqstanda balalar ortalyqtaryn lıtsenzııalaý tolyq tsıfrlandyryldy
ASTANA. KAZINFORM — Balalarǵa arnalǵan bilim berý-saýyqtyrý ortalyqtary elektrondy lıtsenzııalaýǵa kóship jatyr.
Qazaqstanda balalarǵa arnalǵan bilim berý-saýyqtyrý ortalyqtary avtomattandyrylǵan qyzmet túrine qosyldy. Endi uıymdar lıtsenzııa alý úshin ótinimdi memlekettik organdarǵa barmaı-aq, tolyq onlaın formatta elicense.kz portaly arqyly bere alady.
Elektrondy format ruqsat qujattaryn alý rásimin jeńildetip, uıymdardyń ýaqyt jáne ákimshilik shyǵyndaryn azaıtady, sondaı-aq protsestiń ashyqtyǵyn arttyrady.
Aıta keteıik, 2026 jyldan bastap Oqý-aǵartý mınıstrligi balalarǵa arnalǵan bilim berý-saýyqtyrý ortalyqtarynyń qyzmetin mindetti lıtsenzııalaýdy engizdi. Osyǵan baılanysty zańnamada «balalar saýyqtyrý lageri» uǵymy «balalarǵa arnalǵan bilim berý-saýyqtyrý ortalyǵy» termınimen aýystyryldy. Bul uıymdardyń tek saýyqtyrý emes, sonymen qatar bilim berý qyzmetterin de qamtıtyn keńeıtilgen fýnktsııalaryn kórsetedi.
Lıtsenzııa alý úshin elicense.kz portalyna kirip, «Bilim berý» bóliminen tıisti qyzmet túrin tańdaý, qajetti málimetterdi toltyrý, memlekettik baj salyǵyn tóleý jáne ótinimdi elektrondyq tsıfrlyq qoltańba arqyly rastaý qajet. Lıtsenzııa bes jyl merzimge beriledi, al ótinimdi qaraý merzimi 30 jumys kúnine deıin.
Jańashyldyq jyl boıy jáne maýsymdyq jumys isteıtin ortalyqtarǵa qatysty jáne balalarǵa bilim berý-saýyqtyrý qyzmetterin kórsetetin memlekettik te, jekemenshik uıymdarǵa da qoldanylady.
Lıtsenzııalyq talaptar medıtsınalyq qyzmet kórsetýdiń, qaýipsizdik júıeleriniń bolýyn, bekitilgen bilim berý-saýyqtyrý baǵdarlamalaryn, sanıtarııalyq normalardyń saqtalýyn, balalardyń turýyna qolaıly jaǵdaılar men qajetti ınfraqurylymnyń qamtamasyz etilýin qamtıdy.
Atalǵan qyzmet Oqý-aǵartý mınıstrligi, Jasandy ıntellekt jáne tsıfrlyq damý mınıstrligi jáne «Ulttyq aqparattyq tehnologııalar» AQ birlesken jumysy nátıjesinde iske asyryldy.
Aıta ketelik balalar lagerleri men ortalyqtaryn lıtsenzııalaý tártibi ózgeretini týraly jazǵan edik.
