Qazaqstanda balalar qaýipsizdigi kúsheıtilip, jańa tárbıe baǵdarlamalary engizilip jatyr

ASTANA. KAZINFORM – Balalardyń damýy úshin qaýipsiz ári jaıly orta qalyptastyrý jónindegi Prezıdent tapsyrmasyn oryndaý maqsatynda Úkimet tárbıe, quqyq qorǵaý jáne bos ýaqytty tıimdi uıymdastyrýdy qamtıtyn keshendi sharalardy iske asyrýda.

Úkimettiń málimetinshe, jas urpaq boıynda otanshyldyq, ádilettilik jáne eńbekqorlyq qasıetterin qalyptastyrýǵa baǵyttalǵan jańartylǵan biryńǵaı tárbıe baǵdarlamasy – «Adal azamat» osy jumystyń ıdeologııalyq ózegine aınaldy.

Balalardyń quqyqtaryn qorǵaýdy qamtamasyz etý úshin kadrlyq áleýet kúsheıtildi: qorǵanshylyq organdarynyń mamandarynyń sany 303-ten 896 adamǵa deıin artty. Bul otbasylardyń qajettilikterine der kezinde jaýap berýge múmkindik beredi.

- Bilim berý mekemelerinde de fızıkalyq qaýipsizdik sharalary nyǵaıtyldy. Búginde mektepterdiń 97 paıyzy lıtsenzııalanǵan kúzetpen kelisimshartqa otyrdy, al 98 paıyzy týrnıkettermen jabdyqtalǵan, - dep jazylǵan aqparatta.

Sonymen birge qosymsha bilim berý salasy damyp keledi. Elimizde 2 142 qosymsha bilim berý uıymy jumys isteıdi. Olar 3,3 mln balany nemese balalardyń 87,2 paıyzyn qamtıdy. Bul balalardyń qabiletterin damytýǵa, sondaı-aq bos ýaqytyn tıimdi ári qaýipsiz ótkizýine múmkindik beredi.

Aıta keteıik, elimizdegi balalardyń ál-aýqat ındeksi 2,5 pýnktke artty.