Qazaqstanda «Balalar Evrovıdenıesi» baıqaýyna ónerli órenderdi izdep jatyr

ASTANA. QazAqparat - Jaqyn arada Qazaqstan atynan balalarǵa arnalǵan «Evrovıdenıe-2018» án baıqaýyna qatysatyn úmitkerdi irikteý bastalady. Bul týraly baspasóz máslıhatynda «Habar» agenttiginiń basqarma tóraǵasy Alan Ájibaev málim etti, dep habarlaıdy QazAqparat.

Bıyl óner dodasy 25 qarasha kúni Belarýs astanasy Mınskide ótedi. Oǵan 9 ben 14 jas aralyǵyndaǵy jas ánshiler qatysady. «Habar» arnasy balalar arasynda ótetin «Evrovıdenıe-2018» án baıqaýyn kórsetý quqyǵyna ıe boldy. Bul halyqaralyq sharaǵa Qazaqstan alǵash ret qatysqaly otyr. Osy baıqaýǵa 19 memleket qatysady.

Qazirgi kezde agenttik pen QR Aqparat jáne kommýnıkatsııalar mınıstrligi elimizde irikteý júrgizýdiń birneshe nusqasyn qarastyrýda. Árbir talantty balanyń qatysýǵa múmkindigi bolýy úshin barynsha ońtaıly jaǵdaılar jasalmaq.

Baıqaýǵa qatysýdyń tıisti dástúrli erejeleri bar ekenine toqtalǵan A. Ájibaev, osy oraıda qajetti málimetter agenttiktiń saıtynda jarııalanatynyn jetkizdi.

«Mınskige baryp, jeńip shyǵatyn talantty balany taýyp alýymyz kerek. Sondyqtan elimizde barlyq ónerli balalardy qamtýǵa tyrysamyz», - dedi ol.

Belarýs astanasynda ótetin baıqaýdyń sharty boıynsha baıqaýǵa qatysýshylar esh jerde jarııalanbaǵan ándi oryndaýy kerek, sondaı-aq 2 mınýt 45 sekýndtan 3 mınýtqa deıingi kompozıtsııany jandy daýyspen aıtýy qajet. Jeńimpaz telekórermender men quramynda bes adamnan turatyn qazylar alqasynyń daýys berý jolymen anyqtalady.

Aıta keteıik, alǵash ret «Balalar Evrovıdenıesi» (Junior Eurovision Song Contest) 2003 jyly Danııada ótken bolatyn.