Qazaqstanda balalar arasyndaǵy vırýsty gepatıt deńgeıi tómendedi
ASTANA. QazAqparat - Sońǵy 25 jylda Qazaqstan Respýblıkasynda balalar arasyndaǵy vırýsty gepatıttermen aýyrý deńgeıi 1284 esege azaıǵan. Bul týraly QR Densaýlyq saqtaý mınıstrligi medıtsınalyq kómekti uıymdastyrý departamentiniń áleýmettik mańyzdy aýrýlar kezinde medıtsınalyq kómek kórsetý basqarmasynyń basshysy Gúlnar Sársenbaeva málim etti, dep habarlaıdy «QazAqparat» HAA tilshisi.
«Búgin Qazaqstanda Búkilálemdik gepatıtpen kúres kúni atalyp ótýde. Vırýsty gepatıtter eńbekke qabiletti, jas turǵyndarda jıi kezdesedi. Aýrýdyń aldyn alý, dıagnostıka jáne emdeý máseleleri Densaýlyq saqtaýdy damytýdyń «Densaýlyq» memlekettik baǵdarlamasynda qarastyrylǵan. «V» vırýstyq gepatıtiniń aldyn alý úshin 1998 jyldan bastap, Qazaqstanda jańa týǵan sábılerdi jáne medıtsınalyq qyzmetkerlerdi vaktsınatsııalaý jumystary júrgizilip keledi. Aldyn alý jumystarynyń nátıjesinde sońǵy 25 jylda vırýstyq gepatıtpen aýyrý deńgeıi balalar arasynda 1284 esege, eresekter arasynda - 31,5 esege azaıdy», - dep atap ótti Gúlnar Sársenbaeva Ortalyq kommýnıkatsııalar qyzmetinde ótken baspasóz máslıhatynda.
Onyń aıtýynsha, vaktsınatsııa júrgizý, sýdyń sapasyn jaqsartý jáne gepatıttiń aldyn alý týraly túsindirme jumystarynyń nátıjesinde «A» vırýsty gepatıtimen aýyrý deńgeıi de 308,5 esege tómendegen.
Mınıstrlik ókiliniń habarlaýynsha, Qazaqstanda «V» jáne «S» gepatıtterimen aýyratyn 42 myń naýqas tizimde tur. Bul patsıentterge memleket tegin medıtsınalyq kómek kórsetedi. 2011 jyldan beri 60 myńnan astam naýqas «V» jáne «S» gepatıtterinen emdelgen. Densaýlyq saqtaý mınıstrligi vırýsqa qarsy zamanaýı preparattardy tirkeý, zańnamany jetildirý, vırýsty gepatıtterdi emdeýdiń klınıkalyq hattamasyn jańartý syndy jumystardy atqardy.
Sonymen birge, Astanada «Esil» aýdany ákimshiliginiń aýmaǵynda «University medical center» koporatıvti qory men Ulttyq onkologııa men transplantologııa ǵylymı ortalyǵynyń mamandary áleýmettik az qamtylǵan toptar arasynda «V» jáne «S» gepatıtine skrınıng-test, ishki qurylys múshelerin ýltradybystyq tekserý jumystaryn júrgizip jatyr.
