Elimizde jasóspirimder men balalar arasynda fýtbolǵa qyzyǵýshylyq óte joǵary
ASTANA. KAZINFORM – Búgin – Dúnıejúzilik balalar fýtboly kúni. Bul mereke 2001 jyly FIFA men Birikken Ulttar Uıymynyń Balalar qory arasyndaǵy kelisiminiń nátıjesinde belgilengen. Qazaq balalarynyń fýtbolǵa qyzyǵýshylyǵy qandaı? Jibek Joly arnasynyń «Búgin LIVE» baǵdarlamasyna suhbat bergen jas úzdik aıaqdopshylar tarqatty.
– Meni ákem 6 jasymnan fýtbolǵa ertip bardy. Fýtbol oınaý – ózimniń armanym boldy. Sosyn ákeme: «Meni fýtbolǵa jibershi» dep ótinish jasadym. Men ol kisige meni qoldaǵany úshin raqmet aıtqym keledi. Óıtkeni ákeshim meniń fýtbol oınap, jattyǵýyma eshqashan kedergi bolǵan joq. Qazir «Jeńis» fýtbol klýbynyń ekinshi quramynda oınaımyn. Alda negizgi quramǵa ótip, shet eldiń komandalarynda da baǵymdy synap kórgim keledi, - deıdi jas fýtbolshy Ómirjan Omarbek.
Ómirjan qazir kásibı fýtbol klýbta óner kórsetedi. Ol elordalyq komandanyń ekinshi quramynda oınaý oǵan úlken áser etkenin jetkizdi.
– Men kásibı klýbpen kelisimshartqa otyrǵanmyn. Sol boıynsha fýtbol oınap júrmin. Ary qaraı da sport salasynda ónerimdi jalǵastyrǵym keledi. Bizde ár aptada 1 oıyn bolady. Mysaly, biz «Shahter» komandasymen oınadyq. Dúısenbiden bastap, ol qurama oıynshylarynyń qalaı oınaıtynyn, qalaı qorǵanatynyn qarap, saraptaımyz. Sosyn jattyǵyp, olarǵa qarsy shabýyldaý, qorǵaný ádisterin daıyndaımyz. Qazir Ekinshi lıgada oınap júrmin. Fýtbol kóp nárse berdi. Sonyń arqasynda óz-ózime senimdiligim artyp, tártipke úırendim, - deıdi ol.
Jas sportshy joǵary oqý ornynda ózi qalaǵan fýtbol bapkeri mamandyǵynda oqıdy.
– Sport akademııasynyń 2-kýrsynda fýtbol jattyqtyrýshysy mamandyǵyn oqyp júrmin. Sport akademııasynan dıplomymdy alǵannan keıin jattyqtyrýshy bola alamyn. Qazir elimizde fýtbol salasy damyp, bapkerlerge suranys artyp jatyr. Mysaly, bizdiń sport akademııasynda sheteldik mamandar dáris beredi. Biz bir topta shamamen 25 stýdent bilim alamyz, - deıdi «Jeńis» fýtbol klýbynyń oıynshysy.
Al Ómirjan Omarbek bilim alatyn Dene shynyqtyrý jáne buqaralyq sport akademııasynyń rektory Tursynzada Qýanǵalıeva jastardyń fýtbolǵa degen qyzyǵýshylyǵy asa joǵary ekenin aıtady.
– Jasóspirimder men balalar arasynda fýtbolǵa qyzyǵýshylyq óte joǵary. Ony men ózim basqaryp otyrǵan joǵary oqý ornyna qarap aıta alamyn. Óıtkeni bapker bolýdy tańdaǵan bilim alýshylardyń basym bóligi komandalyq oıyn túrlerinen fýtboldy tańdaıdy. Olardyń úlesi – shamamen 30%, – deıdi Tursynzada Qýanǵalıeva.
Elimizdegi balalar arasynda da fýtbol aıtarlyqtaı tanymal. Ásirese keıingi jyldary polıtseı, ǵaryshker, prezıdent bolǵysy keletin balalarǵa qaraǵanda fýtbolshy bolýdy armandaıtyndar kóbeıgen. Solardyń biri «Búgin LIVE» stýdııasynyń qonaǵy – Asan Dýman.
– Fýtbolmen aınalysyp júrgenime 3 jyl boldy. Óıtkeni maǵan bul sport túri qatty unaıdy. Fýtbol meni óz maqsatyma jetýge, komandamen jumys isteýge úıretedi. Komandada qorǵaýshy pozıtsııasynda oınaımyn. Jaqynda quramamyzben qalalyq jarystan 1-oryn aldyq. Sol jarysta men «Úzdik oıynshy» atandym. Bul meniń birinshi altynym. Buǵan deıin de jarystarda oınadym, – deıdi ol.
Asan Dýman bolashaqta kásibı fýtbolshy bolǵysy keletinin jasyrmady.
– Men sabaqty tek 5-ke oqımyn. Óskende kásibı fýtbolshy bolǵym keledi. Qazir ARDA balalar fýtbol klýbynda oınap júrmin. Bas bapkerimiz – Darhan Nııazuly. Ol kisi bizge: «Jattyǵýdy qaldyrma, jalqaý bolma, kóp eńbekten» dep aıtady. Kúnine 1 saǵat jattyǵamyz. Meniń kýmırim – Krıshtıaný Ronaldý, – deıdi 6-synyp oqýshysy.
Elimizdegi balalar fýtboly qalaı damyp jatqanyn bilgińiz kelse, myna siltemege ótińiz.