Qazaqstanda balaǵa beriletin áleýmettik tólemder ózgerýi múmkin be – depýtat jaýap berdi
ASTANA. KAZINFORM - Quryltaı depýtaty Aısulý Súleımen bala tárbıelep otyrǵan otbasylarǵa kórsetiletin áleýmettik qoldaý, bala kútimine baılanysty tólemder jáne olardy qaıta qaraý múmkindigi týraly pikir bildirdi.
Depýtattyń aıtýynsha, memleket tarapynan otbasylarǵa kórsetiletin áleýmettik qoldaýdyń róli zor. Ásirese bala dúnıege kelgen kezde otbasynyń shyǵyny kóbeıedi. Sondyqtan bala týýǵa, bala kútimine, kópbalaly otbasylarǵa jáne múgedektigi bar bala tárbıelep otyrǵan ata-analarǵa beriletin qoldaý mańyzdy. Alaıda Aısulý Súleımen qazirgi tólemder otbasynyń barlyq shyǵynyn tolyq jabady dep aıtý qıyn ekenin atap ótti.
– Ár otbasynyń jaǵdaıy ártúrli. Bir otbasynyń qajettiligi bir basqa, al erekshe kútimdi qajet etetin balasy bar otbasynyń shyǵyny múldem basqa bolýy múmkin. Sondyqtan áleýmettik qoldaýdy tek tólemniń kólemimen ǵana emes, jalpy otbasyǵa kórsetiletin qoldaýdyń jıyntyǵymen baǵalaý kerek. Onyń ishinde medıtsınalyq kómek, bilim berý, balabaqshaǵa qoljetimdilik jáne áleýmettik qyzmetter de bar. Eń bastysy – kómekke shynymen muqtaj otbasy qajetti qoldaýdy ýaqytynda alýy, – dedi depýtat.
Onyń pikirinshe, bala 1,5 jasqa tolǵannan keıin de ata-analardy qoldaýdyń qosymsha múmkindikterin qarastyrý qajet. Óıtkeni balanyń osy jasqa tolýymen otbasynyń shyǵyny men qajettiligi toqtamaıdy. Kerisinshe, ata-ana aldynda balany balabaqshaǵa ornalastyrý jáne jumysqa qaıta shyǵý máselesi týyndaıdy.
– Eger balabaqshada oryn bolmasa, ata-ananyń jumysqa shyǵýy da qıyndaıdy. Sondyqtan ata-anany tek aqshalaı tólem arqyly emes, balabaqsha oryndarynyń qoljetimdiligi arqyly da qoldaý mańyzdy. Ádilet partııasynyń baǵdarlamasynda da bul máselege kóńil bólingen. 2028 jylǵa deıin keminde 79 myń jańa balabaqsha ornyn ashý qarastyrylǵan. Menińshe, bul ata-analardy qoldaýdyń naqty baǵyttarynyń biri. Óıtkeni balabalabaqshaǵa ornalassa, ata-ana jumysqa qaıta shyǵyp, otbasyna tabys ákelýge múmkindik alady, - dedi Aısulý Súleımen.
Depýtat bala kútimine baılanysty tólenetin 40 paıyzdyq tólemge de toqtaldy. Onyń aıtýynsha, bul ata-analar úshin belgili bir deńgeıde qoldaý bolǵanymen, ýaqyt óte azyq-túlik, balanyń kıimi, dári-dármek jáne basqa da qajetti zattardyń baǵasy ósedi. Sondyqtan depýtat bul mólsherlemeniń qazirgi ómir súrý jaǵdaıyna qanshalyqty sáıkes keletinin turaqty túrde taldap otyrý qajet dep esepteıdi.
– Biraq men naqty 40 paıyzdy mindetti túrde kóterý kerek dep birden aıta almaımyn. Sebebi mundaı sheshim qabyldanǵan kezde onyń qansha adamǵa áser etetinin, áleýmettik saqtandyrý júıesine túsetin júktemeni esepteý qajet. Eger taldaý nátıjesinde qazirgi mólsherlemeni qaıta qaraý qajettiligi anyqtalsa, onda bul máseleni qarastyrýǵa bolady. Menińshe, eń bastysy, bala tárbıelep otyrǵan ata-anany qoldaý men memlekettiń qarjylyq múmkindiginiń arasynda durys teńgerim bolýy, - dedi ol.
Aısulý Súleımen áleýmettik tólemderdi aldaǵy ýaqytta halyqtyń naqty jaǵdaıyna qaraı qaıta qarap otyrý mańyzdy ekenin de aıtty. Onyń sózinshe, bul rette memlekettiń bıýdjet múmkindigin eskerý qajet. Áleýmettik mindettemeler turaqty bolýy úshin ekonomıka men bıýdjettiń de turaqtylyǵy mańyzdy.
– Munda eki máseleni qatar qaraý kerek. Birinshisi, ınflıatsııany eskere otyryp, áleýmettik tólemderdiń halyq úshin mańyzyn saqtaý. Ekinshisi, memlekettik qoldaýdyń naqty muqtaj azamattarǵa baǵyttalýyn qamtamasyz etý. Mundaǵy maqsat tek tólem sanyn kóbeıtý emes. Eń bastysy, azamat memleketten tıesili kómekti ýaqytynda jáne tolyq alýy. Sondyqtan aldaǵy ýaqytta áleýmettik tólemderdi halyqtyń naqty jaǵdaıyna qaraı qaıta qarap otyrý, qajet bolǵan jaǵdaıda ındeksteý jáne sonymen birge áleýmettik qoldaýdyń ataýlylyǵyn kúsheıtý mańyzdy, - dedi depýtat.
Aıta keteıik, buǵan deıin Qazaqstanda er adamdarǵa bala kútimine baılanysty demalys berý tártibin jáne bala kútimi kezeńinde áıelderge kórsetiletin qoldaýdy ózgertý máselesi qarastyrylyp jatqany habarlanǵan edi.
