Qazaqstanda balabaqshalarǵa arnalǵan jańa sanıtarlyq normalar engiziledi
ASTANA. QazAqparat - Qazaqstanda balabaqshalarǵa arnalǵan jańa sanıtarlyq normalar men erejeler engiziledi. Búgin Májilistegi Úkimet saǵatynda QR Bilim jáne ǵylym mınıstri Erlan Saǵadıev osylaı málim etti, dep habarlaıdy QazAqparat.
«Bizdiń maqsat - tórt jyldyń ishinde 3-6 jastaǵy balalardy 100 paıyzǵa mektepke deıingi bilimmen qamtý. Balabaqshalardy ashý úshin memlekettik-jekemenshik seriktestikti damytýǵa ekpin qoıyp otyrmyz. 2016 jyly 77 myń orynǵa arnalǵan 825 mektepke deıingi bilim berý uıymdary ashyldy, sonyń ishinde 600-i (45 myń orynǵa arnalǵan) jekemenshik balabaqsha. Osy oraıda 3-6 jastaǵy balalardyń balabaqshamen qamtý 81,6 paıyzdan 85,8 paıyzǵa ósti», - dedi mınıstr.
«Budan ári ne isteýimiz kerek? Birinshiden, jańa sanıtarlyq normalardy qabyldaý. Qazirgi kezde bular oryn tapshylyǵynyń birden bir sebebi. Jańa sanıtarlyq normalar úsh aı talqylanyp, myńdaǵan maman óz pikirlerin bildirdi. Búginde usynystar Ulttyq ekonomıka mınıstrliginiń qaraýynda jatyr», - dedi Erlan Saǵadıev.
Osy oraıda ol jańa sanıtarlyq normalar men erejeler bir aıdyń ishinde qabyldanyp qalýy múmkin ekenin jetkizdi.
