Qazaqstanda balabaqshalardaǵy oryn sany 500-ge deıin ulǵaıtylady
ASTANA. QazAqparat - Qazaqstanda balabaqshalardaǵy oryn sany 500-ge deıin ulǵaıtylady. Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi brıfıngte QR Parlamenti Májiliniń depýtaty Gúlmıra Isimbaeva aıtty.
Onyń atap ótýinshe, búgingi tańda elimizde jumys istep turǵan balabaqshalarda oryn sany 320 balaǵa shaqtap salynǵan. Sondyqtan da depýtattar olardaǵy oryn sanyn 500-ge deıin ulǵaıtý bastamasyn kóterip otyr.
«Biz sarapshylar tobyna Almaty men Astana syndy qalalardaǵy balabaqshalardaǵy oryn sanyn 500-ge deıin ulǵaıtýdy usynýdamyz. Mundaı tájirıbe kóptegen elderde bar. Máselen, Reseı balabaqsha tapshylyǵyn joıý úshin osyndaı qadamǵa baryp otyr», - dedi G.Isimbaeva.
Aıta keterligi, Almaty men Astana qalasynda jáne Ońtústik Qazaqstan, Almaty, Jambyl jáne Mańǵystaý oblystarynda balalardyń mektepke deıingi bilimmen qamtylý deńgeıi ortasha respýblıkalyq kórsetkishten birshama tómen bolyp otyr.
