Qazaqstanda balabaqshaǵa ekpe almaǵan balalardy kirgizýge tyıym salynbaq
«Kodeks jobasy halyqtyń densaýlyǵyn nyǵaıtýǵa baǵyttalǵan normalardy kózdeıdi. Atap aıtqanda: psıhıkalyq densaýlyqty qorǵaý, psıhıkaǵa belsendi áser etetin zattarmen, sondaı-aq qumar oıyndarǵa baılanysty týyndaǵan sýıtsıdtik minez-qulyqtyń jáne qaýiptiń profılaktıkasy boıynsha normalar; bilim berý jáne túsindirý is-sharalaryn ótkizetin tárbıelenýshiler men oqýshylardyń densaýlyǵyn saqtaýǵa ata-analar men pedagogtardy tartý boıynsha normalar; jasóspirimder men jastarǵa qupııa keshendi kómek berý jónindegi normalar reglamentteldi», - dedi ol Májiliste «Halyq densaýlyǵy jáne densaýlyq saqtaý júıesi týraly» kodeks jobasynyń jańa redaktsııasyn tanystyrý barysynda.
Sondaı-aq, mınıstrdiń atap ótýinshe, aýrýdyń profılaktıkasyna baǵyttalǵan jańa erejeleri kózdeledi. Atap aıtqanda, azamattardyń óz densaýlyǵyna mindetti túrde qamqorlyq jasaýy, onyń ishinde skrınıngten mindetti ótýi jáne profılaktıkalyq egýlerdi alýy, qorshaǵan ortanyń halyq densaýlyǵyna áserin, onyń ishinde shý men atmosferalyq aýanyń áserin retteý, mektepke deıingi uıymdarǵa egilmegen balalardy jiberýdi shekteý qarastyrylady.
«Azamattardyń, jumys berýshiler men memlekettiń qoǵamdyq densaýlyqty saqtaýǵa, ınfektsııalyq jáne ınfektsııalyq emes juqpaly aýrýlardyń profılaktıkasyna ortaq jaýapkershiligi kúsheıtildi. Atap aıtqanda: vedomstvoaralyq ózara is-qımyl róli, úkimettik emes uıymdar róli naqtylandy; skrınıngterden ótý úshin mindetti áleýmettik demalystar berý belgilendi; júrgizýshi quqyǵyn alý kezinde alǵashqy kómek kórsetý daǵdylaryna oqytý mindeti reglamenttelgen», - dedi E.Birtanov.
Mınıstrdiń sózine qaraǵanda, atalǵan túzetýlerdi qabyldaý nátıjesinde sýıtsıdtik áreketter men temeki ónimderin, alkogoldik ishimdikterdi tutyný sanynyń tómendeýi kútiledi. Qoǵamdyq densaýlyqty saqtaý nyǵaıa túsedi. Ult densaýlyǵy, onyń ishinde jastardyń reprodýktıvti densaýlyǵynyń profılaktıkasy arqyly nyǵaıtylady. Azamattardyń óz densaýlyǵy úshin ortaq jaýapkershiligi kúsheıe túsedi. Qorshaǵan ortanyń halyq densaýlyǵyna teris áserin tejeý qamtamasyz etiledi. Qyzmetkerdiń erte kezeńinde aýrýlarynyń dıagnostıkasy qamtamasyz etiledi. Jol-kólik apaty kezindegi ólim tómendeıdi.