Qazaqstanda bala kútýshisiniń qyzmeti qansha turady
ASTANA. KAZINFORM – Qazaqstanda bala kútýshisi qyzmetiniń eń arzany qaı óńirde ekenin Kazinform agenttiginiń tilshisi anyqtap bildi.
Qazaqstandyqtar kóbine 1 - 3 jas aralyǵyndaǵy balalaryna bala kútýshisin izdeıdi. Birge turýdy qalaıtyndary az. Bala baǵatyn adam oınatyp, kishkentaılardyń bar jaǵdaıyn jasaýy tıis. Al esin biletin balalardy balabaqshaǵa aparyp-ákelý, mektep pen úıirmelerge tasý kerek.
Elimiz boıynsha bul qyzmet Qostanaıda arzan bolyp shyqty. Munda qyzmet kórsetýshi adam úıine barady nemese kútýshige aparyp tastaıdy. Bul qyzmet saǵatyna 800-1500 teńge turady. Al agenttik arqyly qyzmet kórsetse saǵatyna 2500 teńge alady. Eger úıde qosymsha kómek kórsetse kúnine 5 000-10 000 teńge suraıdy. Bala kútýshisiniń aı saıynǵy qyzmeti - 110-120 myń teńge.
Oralda da qyzmet qoljetimdi. Munda bala kútýshileri saǵatyna 1000-1500 teńge alady. Al aı saıynǵy jalaqysy 100-150 myń teńge.
Shymkentte bala baǵatyn adam úıińizge keledi. Onyń qyzmeti saǵatyna 1200-1500 teńge. Al eger balańyzdy ortalyqqa aparyp tastasańyz, ondaǵy qyzmet saǵatyna 1000-1200 teńge. Eger balanyń aıaǵy shyqpaǵan bolsa, qosymsha aqy tóleýge týra keledi. Munda bala baǵatyn adam aı saıyn 150-300 myń teńge suraıdy.
Taldyqorǵanda saǵatyna qyzmet kórsetetin bala kútýshileri 1000-2000 teńge suraıdy. Olardyń aı saıynǵy jalaqysy 150-200 myń teńge. Semeıde de dál osyndaı usynys men suranysty kórýge bolady. Munda da baǵa saǵatyna 1000-2000 teńge. Al aıyna 110-150 myń teńge (kóbine aspaz qyzmeti qosa usynylady) turady.
Tarazda balany bir saǵat baǵyp otyrý qyzmeti saǵatyna 800 teńge (balany ortalyqqa aparý kerek) turady. Al bala kútýshisi úıińizge barsa, saǵatyna 1000-3000 teńge tóleısiz. Aı saıynǵy qyzmet quny shamamen 100-120 myń teńge turady.
Aqtóbede saǵatyna 1500 teńge suraıdy. Qyzylordada da dál osy baǵa. Aqtóbede bala kútýshisiniń aı saıynǵy jalaqysy 170-280 myń teńge, al Qyzylordada 60 myńnan bastalyp 200 myń teńgege (ol bala kútýshisiniń qaıda turatynyna baılanysty) jetedi.
Jezqazǵan, Qaraǵandy, Petropavl qalalarynyń turǵyndary bala kútýshisin bir saǵatqa shaqyrsa 2000 teńge tóleıdi. Al bir aıdyń jalaqy ár óńirde ártúrli. Jezqazǵanda 70 myń teńgeden bastalyp 200 myńǵa jetedi. Qaraǵandyda 140 myńnan bastalyp 200 myń teńgege deıin barady. Al Petropavlda baǵa 100 myń teńgeden bastalady. Sonymen birge onda saǵat 9:00-den 17:00-ge deıin bala baqqan adam 5000 teńge (suranys kóbine bala kútimimen úıde otyrǵan kópbalaly analardan túsedi) alady.
Kókshetaýda bala kútýshisiniń aı saıynǵy qyzmeti 150-200 myń teńge turady. Al saǵatyna 2000-2500 teńge suraıdy.
Pavlodarlyqtar balasyn baǵatyn adamnyń úıine aparyp tastap, saǵatyna 800-900 teńge tóleıdi. Al úıine shaqyrsa 2000-3000 teńge beredi. Eger bala kútýshisi túnde baǵyp berse, qyzmet quny 15 000 teńgege (saǵat 19:00-den tańǵa deıin) jetedi. Aı saıynǵy qyzmet quny - 250-300 myń teńge.
Túrkistanda da dál osy baǵa. Bala kútýshisi saǵatyna 2000-3000 teńge alady. Al bir aılyq qyzmeti 100-120 myń teńge turady.
Qonaevta balany bir saǵat baǵyp beretin kútýshi 2000-6000 teńge alady. Al aı saıynǵy qyzmet quny 110-120 myń teńge.
Atyraýda balaǵa bir saǵat bas-kóz bolyp otyrý qyzmetiniń quny 2000-8000 teńge. Bala kútýshileriniń bir aılyq qyzmetiniń quny - 140-160 myń teńge.
Óskemende bala kútýshisiniń bir saǵattyq qyzmeti 2500-3000 teńge turady. Al aı saıyn 80-120 myń tóleýge bolady.
Eń qymbaty - Aqtaý qalasynda. Munda bala kútýshileriniń bir saǵattyq qyzmeti 3000-5000 teńge turady. Al aı saıynǵy qyzmet quny 150-250 myń teńge.
Almatyda bala kútýshisi saǵatyna 2000 teńge alady. Al eger bala kútýshisi úı ıesimen birge tursa aı saıyn 200 myń teńge tóleıdi. Baryp-kelip qyzmet kórsetse aıyna 350 mvń teńge suraıdy. Sonymen birge Almatyda demalys kúnderi de bala kútýshisiniń qyzmetin (qyzmet quny - 15 000 teńge) paıdalanýǵa bolady.
Elordada balany bir saǵat baǵyp berý quny 2000-8000 teńge turady. Aı saıynǵy qyzmet quny - 350-500 myń teńge. Astanada kóbine bala kútýshisi úı ıesimen birge turady. Ári balany saǵatyna emes, qajet kezde birneshe jyl boıy baǵyp berýge shaqyrady.
Kazinform buǵan deıin fotograf adamdar qyzmetiniń baǵasyn salystyrdy.