Qazaqstanda bala quqyǵyn qorǵaıtyn keıs-menedjer laýazymy engiziledi
ASTANA. KAZINFORM – Qazaqstannyń qorǵanshylyq jáne qamqorshylyq organdarynda ár balany jeke qoldaý maqsatynda keıs-menedjer laýazymy paıda bolady. Bul týraly Ortalyq kommýnıkatsııalar qyzmetinde ótken brıfıngte Oqý-aǵartý vıtse-mınıstri Shynar Aqparova málimdedi.
Jańa ınstıtýt Memleket basshysynyń balanyń ómiri, oqýy jáne damýy úshin qaýipsiz orta qurý týraly tapsyrmasy aıasynda iske asyrylmaq. Keıs-menedjerler qorǵanshylyq organdarynyń qyzmetkerleri arasynan taǵaıyndalady.
– Árbir balany jeke qoldaý úshin qorǵanshylyq jáne qamqorshylyq organdarynda keıs-menedjer laýazymy engiziledi. Pedagog-psıhologtar men áleýmettik pedagogtarǵa jańa talaptar qoıylyp, olar jyl saıyn oqytýdan ótedi. Sonymen qatar, osy sala mamandaryn daıarlaý úshin jyl saıyn 200 bilim berý granty bólinedi, – dedi Shynar Aqparova.
Jańa mamandyq ıeleri túrli memlekettik qurylymdar arasyndaǵy negizgi baılanystyrýshy býyn bolmaq.
Olardyń negizgi mindetterine mynalar jatady:
Bilim berý, áleýmettik qorǵaý, densaýlyq saqtaý, quqyq qorǵaý organdary men psıhologııalyq qyzmetterdiń jumysyn úılestirý;
Ár balaǵa arnalǵan jeke kómek josparyn qurý jáne ony iske asyrý;
Balaǵa medıtsınalyq, psıhologııalyq, pedagogıkalyq, áleýmettik jáne quqyqtyq qoldaý kórsetýdi uıymdastyrý.
Vıtse-mınıstrdiń aıtýynsha, bul reforma kadr máselesin de qamtıdy. Mamandardyń kásibı deńgeıin arttyrý úshin arnaıy bilim berý granttary qarastyrylǵan. Endigi kezekte árbir qıyn jaǵdaıda qalǵan balanyń taǵdyry jeke bir mamannyń jiti baqylaýynda bolady.
Aıta keteıik, buǵan deıin Premer-mınıstr Oljas Bektenov oblys ákimderine bala quqyǵyn qorǵaý basqarmalaryn qurýdy 2 aıda aıaqtaýdy tapsyrǵan bolatyn.