Qazaqstanda «Bala daýysy» baıqaýynyń ekinshi maýsymy ótedi
ASTANA. QazAqparat - Respýblıkanyń túpkir-túpkirindegi jas talanttardyń baǵyn ashatyn «Bala daýysy» ulttyq án baıqaýynyń ekinshi maýsymy bastaý aldy.
Daryn ıeleri Dısneılendke saıahat joldamasyn jáne elimizdiń tańdaýly mýzykalyq bilim ordalarynyń granttaryn ıelený úshin baq talastyratyn bolady. Bul týraly búgin Astanada Ortalyq kommýnıkatsııalar qyzmetinde ótken baspasóz konferentsııasynda habarlandy.
7-13 jas aralyǵyndaǵy balalarǵa arnalǵan «Bala daýysy» ulttyq án baıqaýy - Álııa Nazarbaevanyń «Jandaný álemi» qorynyń jobasy. Atalǵan qordyń shyǵarmashylyq toby 12 mamyr - 22 maýsym aralyǵynda Astana men Almaty qalalaryna jáne elimizdiń barlyq aımaqtaryna baryp, irikteý kezeńderin ótkizetin bolady. Alǵashqy óńirlik irikteý 12 mamyr kúni Pavlodar qalasy, Estaı atyndaǵy mádenıet saraıynda ótpek. Ekinshi maýsymnyń Pavlodar qalasynda bastalýy da kezdeısoq emes. Ótken jyly «Bala daýysy - 2016» baıqaýynyń bas júldesin pavlodarlyq Merhat Jylqybaev pen Marııa Zatvarnıtskaıa jeńip alǵan edi.
Іrikteýden ótken elimizdiń 16 jas daryny kúzde Almatydaǵy «Bala daýysy» án mektebinde bas qosady. Onda kásibı mýzykanttar, horeograftar, stılıster balalardy sýper-fınaldyń televızııalyq túsirilimderine daıyndaıdy.
Baıqaý fınaly 27, 28 jáne 29 qazan kúnderi «Almaty Arena» muz saraıynda ótedi. Kórermender qazaq estarada juldyzdarynyń jáne baıqaý fınalısteriniń qatysýymen ótetin úsh keshtiń kýágeri bola alady. Baıqaýdyń aqtyq kezeńderin kásibı qazylar alqasy jáne sms-daýys berý arqyly telekórermender baǵalaıdy.
