Qazaqstanda bala asyrap alýmen kásibı aınalysatyn otbasylar bolady
QR Oqý-aǵartý vıtse-mınıstri Edil Ospan Májilis depýtattaryna Bilim berý jáne bala quqyqtaryn qorǵaý máseleleri jónindegi jańa zań jobasyn tanystyrdy, dep habarlaıdy Kazinform.
Zań jobasy eki kodekske jáne 5 zańǵa ózgerister men tolyqtyrýlar engizýdi kózdeıdi.
Onyń maqsaty – QR orta, tehnıkalyq jáne kásiptik bilim, orta bilimnen keıingi bilim berý, qosymsha bilim berý jáne balalardyń quqyqtaryn qorǵaý salasyndaǵy zańnamasyn jetildirý, sondaı-aq, quqyqtyq olqylyqtardy, qaıshylyqtardy joıý bolyp otyr.
«Bul rette zań jobasymen usynylatyn negizgi novellalar kelesideı – balalardy asyrap alatyn kásibı otbasy ınstıtýtyn engizý, balalarǵa arnalǵan qosymsha bilim berý uıymdary úshin habarlama tártibin engizý, menshik nysanyna qaramastan, bilim berý uıymdarynda balalardyń jekelegen sanattarynyń qoldaý alýǵa quqyqtaryn keńeıtý, tehnıkalyq jáne kásiptik bilim berý baǵdarlamalary boıynsha onlaın oqytýdy engizý. Búgingi tańda respýblıkamyzda 22 myńnan astam jetim jáne ana-ata qamqorlyǵynsyz qalǵan bala bar. Memleket tarapynan júrgizilgen saıasat nátıjesinde 12 jylda balalar úıiniń tárıbelenýshileri sany 4 esege, balalar úıleriniń sany – 2,5 esege azaıdy. Qazirgi ýaqytta bilim, densaýlyq áleýmettik qorǵaý salalaryna qaraıtyn 116 uıymda 3509 jetim jáne ata-ana qamqorlyǵynsyz balalar bar», - dedi E. Ospan Májiliste.
Balany qabyldaıtyn kásibı otbasylar ınstıtýtyn engizýde jańa tásilder usynylady.
Máselen, bala tabylǵan soń balalar úıine emes, birden otbasyna tabystalady.
Árbir bala ata-ananyń nazarymen jáne qamqorlyǵymen qamtylýy úshin bir kásibı otbasyndaǵy bala sany tórteýden asyrylmaıdy.
Asyrap alýshy ata-analardyń jasy 30-53 aralyǵynda bolady, balany qabyldaıtyn kásibı otbasy mártebesin alýǵa úmitker otbasylar psıhologııalyq daıarlyqtan jáne qamqorshylyq jáne qorǵanshylyq organdarda akkredıtteýden ótedi.
Psıhologııalyq daıyndyqty jetim balalarǵa arnalǵan bilim berý uıymdary júzege asyrady.
Atalǵan uıymdar oqytý qorytyndysy boıynsha óz usynymyn daıyndaıdy.
Qorǵanshylyq organdar kásibı otbasy úmitkerleriniń zańnama talaptaryna sáıkestigin qaraıdy jáne daıyndalǵan qorytyndyǵa taldaý júrgizip, nátıjesi boıynsha úmitker otbasyn akkredıtteýden ótkizedi.
«Sondaı-aq, zań jobasynda otbasylarǵa jiberiletin balalar sanatyn keńeıtý usynylady. Endi otbasylarǵa jetim jáne ata-ana qamqorlyǵynsyz qalǵan balalarmen qatar panasyz, qaraýsyz qalǵan arnaıy áleýmettik qoldaýǵa muqtaj balalardy da ornalastyrýdy usynyp otyrmyz. Materıaldyq yntalandyrý úshin árbir jetim balany asyrap-baǵýǵa 10 AEK mólsherinde aı saıynǵy járdemaqy jáne balalardyń otbasynda bolý merzimine baılanysty árbir kásibı tárbıeshi qyzmetine 70 AEK aqy tóleý kózdelgen. Usynylyp otyrǵan jańa ınstıtýt jetim jáne ata-ana qamqorlyǵynsyz qalǵan balalardyń jáne panasyz, qaraýsyz qalǵan balalardyń otbasynda tárbıelený quqyǵyn qamtamasyz etýge baǵyttalǵan mańyzdy qadam bolmaq», - deıdi vıtse-mınıstr.
