Qazaqstanda BAQ qyzmetkerleriniń kásipodaǵy tirkeldi

ALMATY. QazAqparat -11 jeltoqsanda elimizde «Mass-medıa, telekommýnıkatsııa qyzmetkerleriniń salalyq kásipodaǵy» qoǵamdyq uıymy tirkeldi. Onyń jumysy jýrnalısterdiń quqyǵyn qorǵaýǵa baǵyttalǵan.

Bul týraly osy kásipodaqty qurýshylar búgin Almatyda ótken baspasóz máslıhatynda málimdedi.

Kásipodaq tóraıymy Elena Malygına atalmysh uıym eńbek kelisimshartyn jasarda jáne sotta BAQ qyzmetkerleriniń múddesin qorǵaıtyndyǵyn, sondaı-aq QR «Eńbek Kodeksi» men «Kásipodaqtar týraly» Zań boıynsha túsindirý jumystaryn júrgizetindigin jetkizdi.

«Biz zańnamalarda kórsetilgen normalardyń saqtalǵanyn qalaımyz. Negizi, árbir redaktsııanyń óz kásipodaǵy bolýy kerek. Bul úderis búkil eldi qamtýy tıis. Biz tirkeldik, endi múshelik jarna jáne basqa da máselelerdi aldaǵy ýaqytta sheshetin bolamyz», - dedi ol.

Kásipodaqty uıymdastyrýshylardyń biri - Lıýdmıla Ekzarhova óz sózinde qazirgi tańda Almaty men Astanany qosqanda elimizdiń kem degende 10 óńirinde bastaýysh kásipodaq uıymdaryn qurý kerektigin jetkizdi. Sonda kásipodaq óz mártebesin rastap, jýrnalısterge resmı túrde kómek kórsete alady. Sondaı-aq ol, bul uıymdarda jumys berýshilermen kelissóz júrgizetin kóshbasshy tulǵalardy saılaý kerektigin aıtty.