Qazaqstanda baǵdarlamany oryndamaǵan sheneýnikterdi qyzmetten bosatý usynyldy
ASTANA. QazAqparat - Astana qalasynyń «Qazaqstan-2050» demokratııalyq kúshter koalıtsııasy QR Prezıdentiniń Joldaýy men bılik tarmaqtarynyń quzyryn úlestirý jónindegi úndeýin talqyǵa saldy, dep xabarlaıdy QazAqparat.
Koalıtsııa músheleri Memleket basshysy usynǵan ekonomıkalyq bastamalardy jáne memlekettik basqarý júıesindegi bolashaq ózgeristerge qatysty qoldaý bildirdi. Sonymen qatar óz usynystaryn jetkizdi. Qazaqstannyń kommýnııstik partııasynyń birinshi xatshysy Marat Áýbákirov memlekettiń strategııalyq baǵdarlamalaryn oryndaýda enjarlyq tanytqan basshylardy jumystan qýý kerek dep sanaıdy.
«Biz xalyqpen kezdesemiz, sol kezde olar baǵyt durys ekendigin aıtýda. Ekonomıka, áleýmettik máseleler oryndy kóteriledi. Biraq qarapaıym xalyqqa Prezıdent quzyryn Parlamentke, Úkimetke úlestirý kóp eshteńe bildirmeıdi, olar dastarxanda nan, úıde molshylyq bolsa deıdi. Biz bunyń aldynda aıtylǵan Joldaýlardyń oryndalýyna esh oralǵan emespiz. Taǵy da bolashaqqa mindetter qoıyldy, al burynǵy tapsyrmalar oryndalmaı sol kúıi qaldy», - deıdi ol.
Ol mysal retinde tek 80%-ǵa oryndalǵan «100 mektep, 100 aýrýxana» baǵdarlamasyn mysalǵa keltirdi. Sondaı-aq ındýstrıaldy baǵdarlama aıasynda qurylǵan birqatar kásiporyndardyń turalap qalǵanyn aıtty.
«Jańa mindetterdi qoıa otyryp, sheshilmegen suraqtarǵa da mán bergen jón. Birde bir mınıstr, komıtet basshysy baǵdarlamanyń oryndalmaýyna baılanysty qyzmetinen bosatylǵan joq. Tek jemqorlyqpen ustalǵandary bar. Jumysyna she? Anda jol úsh jyldan beri salynbady, aýylda bes jyl xalyq ózennen sý iship otyr degen aqparattar qylań berip jatyr, ákimder bolsa, qalaı otyrdy, solaı áli jumys isteýde», - dep atap ótti ol.
