Qazaqstanda baǵaly metaldyń zańsyz aınalymy úshin jaýapkershilik kúsheıtilmek
«2016 jyldan beri mınıstrlik turaqty negizde baǵaly metaldar aınalymy, ony zańsyz shyǵarý men qaı óńdeýge qatysty jańapkershilikti kúsheıtýge bastamashylyq etti. 2018 jyly Aqmola oblysyndaǵy kásiporyndarda asyl metaldardy jymqyrý jaǵdaıy boldy. Biz sol kezde de bul máseleni kótergen edik», - dedi QR Indýstrııa jáne ınfraqurylymdyq damý mınıstri Beıbit Atamqulov.
Óz kezeginde Májilis tóraǵasy Nurlan Nyǵmatýlın osy qylmys úshin jaýapkershilik kúsheıtilgen elderdiń tájirıbesin aıtty.
«EAEO-nyń elderinde baǵaly metaldardyń zańsyz aınalymy úshin qylmystyq jaýapkershilik qarastyrylǵan. Máselen, Reseıde baǵaly metaldyń zańsyz aınalymyna 3 jylǵa deıin bas bostandyǵynan aıyrý qarastyrylǵan. Osy áreketter iri kólemde nemese uıymdasqan qylmys túrinde jasalsa, 7 jylǵa deıin bas bostandyǵynan aıyrý jazasy beriledi. Osyǵan uqsas bap Belarýs zańnamasynda qarastyrylǵan. Al bizde baǵaly metaldyń zańsyz aınalymy úshin ákimshilik jaýapkershilik eskerilgen. Elimizde baǵaly metaldy urlaý men onyń zańsyz aınalymy jyl saıyn artyp keledi», - dedi N. Nyǵmatýlın.
Osy oraıda ol qylmyskerlerdi ákimshilik qamaýǵa alý nemese 17 AEK somasyndaǵy aıyppul toqtata almaı jatqanyn atap ótti. Sebebi altyndy zańsyz óndirý, satyp alý, zańsyz saýdalaý tabysty bolyp tur.
«Іshki ister mınıstrligi de, Bas prokýratýra da jaýapkershilikti kúsheıtýge qarsy emes. Bul rette mınıstrlik (QR IIDM) qaı tarapty qoldap tur degen saýal týyndap otyr. Nege qajetti qadamdar jasalmaǵan? Ókiletti organ retinde Indýstrııa jáne ınfraqurylymdyq damý mınıstrligi baǵaly metaldyń zańsyz aınalymy úshin jazany kúsheıtýge birinshi kezekte múddeli bolýy tıis. Sizderge bul problemany aıtyp qana qoımaı, tıisti usynys engizý kerek», - dedi Májilis tóraǵasy.
Aıta keteıik, búgin Májilistiń jalpy otyrysynda «Eýrazııalyq ekonomıkalyq odaq sheńberinde baǵaly metaldarmen jáne asyl tastarmen operatsııalardy júzege asyrý erekshelikteri týraly kelisimdi ratıfıkatsııalaý týraly» zań jobasy maquldandy.
