Qazaqstanda azyq-túlik taýarlary men shıkizatty óndirý qory jetkilikti – QR AShM
NUR-SULTAN. QazAqparat - Qazaqstan Respýblıkasy Aýyl sharýashylyǵy mınıstrligi azamattardy áleýmettik mańyzy bar azyq-túlik taýarlarymen (ÁMAT) qamtamasyz etý jumysy týraly jáne onyń turaqty túrde júrgiziletini týraly habardar etedi.
«Respýblıka otandyq óndiris esebinen nan, un, makaron ónimderi, ósimdik maılary, kartop jáne kókónis ónimderi, et, qaraqumyq jarmasy, kúrish, sút jáne sút ónimderi jáne t. b. azyq-túlik taýarlarynyń qajetti kólemimen tolyq qamtamasyz etilgen.
Azyq-túliktiń ekonomıkalyq qoljetimdiligin qamtamasyz etý úshin óńirlerdiń turaqtandyrý qorlarynda azyq-túlik taýarlarynyń qajetti qorlary qalyptastyryldy.
Respýblıkanyń azyq-túlik qaýipsizdigi, sondaı-aq aýyl sharýashylyǵy qurylymdarynyń úzdiksiz jumysy máseleleri turaqty baqylaýda.
Atap aıtqanda, jedel derekter boıynsha respýblıkada bıylǵy jyldyń 4 naýryzyna 1,5 mln tonna ÁMAT jáne 6,7 mln tonna azyq-túlik bıdaıynyń qory bar»,-delingen habarlamada.
Azyq-túlik ónimderin óndirý toqtatylmaıdy, qorlar júıeli negizde tolyqtyrylyp otyrady. Jarma, un, konserviler jáne basqa da taýarlar óndirisi úshin jetkilikti shıkizat, sondaı-aq et jáne sút ónimderin óndirý úshin jetkilikti mal basy bar.
«Joǵaryda baıandalǵannyń negizinde, QR Aýyl sharýashylyǵy mınıstrligi elimizde áleýmettik mańyzy bar azyq-túlik ónimderi tapshylyǵynyń týyndaý táýekeli joq ekenin jetkizedi»,-dep málim etti QR AShM.
