Qazaqstanda azyq-túlik tapshylyǵy bolmaıdy – QR AShM

NUR-SULTAN. QazAqparat – Qazaqstanda azyq-túlik taýarlarynyń óndirisi toqtamaıdy jáne esh tapshylyq kútilmeıdi. Bul týraly QR AShM Agrarlyq azyq-túlik naryqtary, organıkalyq ónim jáne tehnıkalyq retteý departamenti dırektorynyń mindetin atqarýshy Sáýle Jurynova aıtyp berdi, dep habarlaıdy QazAqparat tilshisi.

«Qazirgi ýaqytta AShM áleýmettik mańyzy bar 32 azyq-túlik taýarlary boıynsha óńirlerdiń qamtamasyz etilýine monıtorıng júrýde. Bul monıtorıng ár apta saıyn turaqtandyrý qorlarynda, iri saýda júıelerinde, jetkizýshilerdiń jáne qaıta óńdeý kásiporyndarynyń qoımalaryndaǵy qorlardy eskeredi. Óńirlerdiń jedel derekteri boıynsha, bıylǵy 16 qazanda respýblıkada 1,9 mln azyq-túlik taýarlarynyń qory bar. Onyń ishinde turaqtandyrý qorlarynda – 25,3 myń tonna, óndirýshi kásiporyndarda – 1,6 mln tonna, qoımalarda – 137 myń tonna, saýda jerlerinde – 172 myń tonna, budan basqa 813,2 mln dana jumyrtqa jáne 10,9 mln tonna azyq-túlik bıdaıy bar», - dedi spıker Ortalyq kommýnıkatsııalar qyzmetinde «KVI jaǵdaıynda azyq-túlik ónimderiniń baǵasyn retteý jáne azyq-túlik qaýipsizdigin qamtamasyz etý týraly» baspasóz máslıhatynda.

Qolda bar ónim qorlary tez buzylatyn ónimder boıynsha bir aptaǵa, basqalary boıynsha – birneshe aıǵa jetetinin kórsetedi.

«Azyq-túlik taýarlarynyń óndirisi toqtamaıdy jáne qorlar únemi jańartylyp, tolyqtyrylyp otyrady. Sondyqtan, olar boıynsha tapshylyq joq jáne kútilmeıdi.

Qazirgi ýaqytta dándi jáne dándi-burshaq daqyldaryn jınaý 99,8 paıyzǵa aıaqtaldy. Jınalmaǵan azdaǵan júgeri men kúrish alqaptary ǵana bar. Osy kúnderi 20,5 tonna astyq bastyryldy. Jınalǵan dándi jáne dándi-burshaq daqyldarynyń kólemi elimizdiń ishki qajettiligin tolyq qamtýǵa jáne 7,8 mln tonna astyqtyń eksporttyń áleýmetin iske asyrýǵa jetkilikti», - dedi Sáýle Jurynova.

Buǵan deıin baspasóz máslıhatynda elordada azyq-túlik baǵasynyń qalaı retteletini túsindirildi.