Qazaqstanda azyq-túlik ónimderiniń sapasyn tekseretin arnaıy memlekettik organ qurylýy múmkin - A.Mamytbekov
Bul týraly búgin QR Prezıdenti janyndaǵy Ortalyq kommýnıkatsııalar kyzmetindegi brıfıngte QR Aýyl sharýashylyǵy mınıstri Asyljan Mamytbekov aıtty.
"Importtyq, sapasyz, tehnıkalyq reglamentteri saqtalmaǵan azyq-túlik ónimderi bizdiń naryǵymyzǵa kóptep kelýde. Ony tekseretin organdar oǵan basa kóńil bóle de bermeıdi. Bul otandyq taýar óndirýshilerimizge tikeleı keri áserin tıgizip otyr. Biz qazir Qazaqstanǵa qus etiniń 60 paıyzyn shet memleketterden ımporttaımyz. Bizdiń ishki óndirisimiz eldegi suranystyń tek qana 40 paıyzyn jaýyp otyr. Soǵan qaramastan qus etin shyǵaratyn qazaqstandyq fabrıkalar ózimizdiń elimizde óz ónimderin sata almaı júr. Óıtkeni ákelingen qus etine tıisti markırovka jasalynbaǵan, memlekettik tilde olardyń tehnıkalyq reglamentke saı bolýy týraly aqparat jazylmaǵan, onyń sapasy óte tómen. Sondaı-aq etterge sý jáne fosfattar qosylyp, salmaǵy jasandy kóbeıtiledi de quny arzan bolyp shyǵady. Bul, árıne básekelestikke qaıshy keletin nárse", - dep atap kórsetti mınıstr.
Onyń aıtýynsha, sonyń saldarynan otandyq óndirýshiler básekege tótep bere almaýda. Jaqyn kúnderi mınıstrliktiń bastamasy boıynsha Indýstrııa jáne jańa tehnologııalar mınıstrligine qaraıtyn metrologııa jáne tehnıkalyq reglamentterdi baqylaý komıteti jáne Aýyl sharýashylyǵy mınıstrligi sanepıdemıologııalyq komıtetiniń birlesken reıdteri ótkizilgen.
"Bizdiń sýpermarket, dúken, bazarlarda osyndaı óte kóp taýarlardy anyqtap, kózin joıdyq. Sonyń arqasynda bizdiń qus óndiretin fabrıkalardyń saýda kólemi bir aıdyń ishinde 30 paıyzǵa deıin artqanyn kórip otyrmyz. Sony eskere otyryp, Úkimet Elbasyna arnaıy hat jazyp, tehnıkalyq reglamentterdi, ónimderdiń sapasyn tekseretin arnaıy memlekettik organ qurý jóninde usynys jasady. Tıisti sheshim qabyldanady dep oılaımyz. Odan basqa ónimderdiń sapasyn qadaǵalaıtyn monıtorlyq júıe qurý, oǵan qosymsha zerthanalar sanyn arttyrý jáne basqa da úlken is-sharalar qabyldanbaqshy", -dedi A.Mamytbekov.
Mınıstrdiń atap ótkenindeı, búginde tekseristerdi birneshe organdar atqaryp júr. Bul óz kezeginde osy saladaǵy jumystyń tıimdiligine keri áser etpek.
"Atalǵan memlekettiń organnyń qashan qurylatyndyǵyn bizdiń mınıstrlik sheshpeıdi. Bizdiń qalaýymyz, bul tezirek bolsa eken deımiz. Organ, menińshe, otandyq jáne ımporttyq azyq-túliktiń barlyq túrlerin tekseretin bolady. Bul - ımportpen kúresetin organ emes, tutynýshylardyń múddesin qorǵaıtyn organ bolady. Sapasyz ári arzan ónimderge tosqaýyl bolǵan kezde, ol otandyq óndirýshilerdiń básekege qabilettigin arttyrmaq", - dep túıdi sózin A.Mamytbekov.