Qazaqstanda azyq-túlik ımportynyń jańa rekordy tirkeldi
NUR-SULTAN. QazAqparat – Qazaqstanda azyq-túlik ımportynyń jańa rekordy tirkeldi. Bul týraly «Atameken» UKP Agroónerkásip kesheni jáne tamaq ónerkásibi departamentiniń dırektory Erbol Eseneev málim etti, dep habarlaıdy QazAqparat tilshisi.
«Sońǵy jyly ımport boıynsha antırekord tirkeldi. Statıstıkanyń qorytyndy esebi mamyrǵa qaraı daıyn bolady. Degenmen, qazirdiń ózinde 4,9 mlrd dollardyń azyq-túliginiń jetkizilgenin kórip otyrmyz. Árıne, syrtqy faktorlarǵa osylaı táýeldi bolǵan kezde «bolashaqta ózimizdi azyq-túlikpen qalaı qamtamasyz etemiz, nemen qorektenemiz?» degen saýal ótkir bola túsedi», - dedi ol.
Onyń atap ótýinshe, ótken jyly elimizge ákelingen azyq-túlik ónimderdiń jartysynan kóbi Reseıge tıesili.
Tek qana 300 mln dollarǵa konfet pen pechene, 200 mln dollarǵa qant ımporttap otyrmyz.
Al «Qazaqstan maı-tońmaı odaǵy» qaýymdastyǵynyń prezıdenti Konstantın Nevzorovtyń dereginshe, búginde elimizde tamaq sektorynda 2,5 myń kásiporyn jumys isteıdi.
2021 jyly olar 2,2 trln teńgeden astam somaǵa azyq-túlik ónimderin shyǵarǵan.
Osy oraıda «Atameken» UKP otandyq azyq-túlik ónimderin óndirýshilerge qolaıly jaǵdaı jasaý qajettigin alǵa jartady.
Onyń ishinde ishki naryqty qorǵaý úshin erekshe jaǵdaı jasaý, eksportty damytý, iri saýda jelilerin otandyq azyq-túlik ónimderin qoldaýǵa jumyldyrý jáne el azamattaryna qazaqstandyq ónimderdi tańdaýdy nasıhattaý kerek.
