Qazaqstanda azyq-túlik bir jylda qanshaǵa qymbattady
NUR-SULTAN. QazAqparat – Qazaqstanda azyq-túlik baǵasy bir jylda, ıaǵnı 2019 jylǵy tamyz ben 2020 jylǵy tamyz aralyǵynda 10,9% qymbattady, dep habarlaıdy QazAqparat.
QR Ulttyq ekonomıka mınıstrligi Statıstıka komıtetiniń málimetin sáıkes, elimizde bir jylda nan ónimderi jáne jarmalar, et, balyq jáne teńiz ónimderi, sút ónimderi, jumyrtqa, maı jáne tońmaı, kondıterlik ónimder, jemister jáne jańa jınalǵan kókónister, kartop, alkogolsiz sýsyndar jáne alkogoldi ishimdikter qymbattady. Baǵa tek qantqa tómendegen.
Atap aıtqanda, 2020 jylǵy tamyzda súıegi bar jylqy etine ortasha baǵa kelisine 2210 teńgeni (2019 jylǵy tamyzda – 1933 teńge), súıegi bar qoı etine – 1940 teńgeni (1648 teńge), sıyr etiniń jaýyryn-tós bóligine – 1909 teńgeni (1713 teńge), shoshqa etiniń jaýyryn bóligine – 1567 teńgeni (1416 teńge), taýyqtyń san etine 821 teńgeni (812 teńge) qurady.
Qanttyń ortasha baǵasy bıylǵy tamyzda kelisine 211 teńge boldy. Byltyrǵy tamyzda ol 233 teńge turǵan edi.
Sondaı-aq 2020 jylǵy tamyzda sábizge ortasha baǵa kelisine 122 teńgeni (2019 jylǵy tamyzda – 147 teńge), kartopqa – 117 teńgeni (111 teńge), basty pııazǵa 92 teńgeni (129 teńge), aq qaýdandy qyryqqabatqa 88 teńgeni (100 teńge) qurady.
