Qazaqstanda azot totyǵyn anyqtaıtyn jańa saraptama ádistemesi ázirlendi
ASTANA. KAZINFORM – Qazaqstanda densaýlyqqa qaýipti azot totyǵynyń zańsyz aınalymyna qarsy baqylaý kúsheıtiledi. Bul týraly Ortalyq kommýnıkatsııalar qyzmetinde ótken baspasóz konferentsııasynda Ádilet mınıstrligi Sot saraptamalary ortalyǵynyń dırektory Baqytjan Baıtılesov málim etti.
Onyń aıtýynsha, 2026 jylǵy 1 qańtardan bastap azot totyǵyn zańsyz saqtaý, tasymaldaý jáne ótkizý áreketteri úshin qylmystyq jaýapkershilik qarastyrylady.
– Azot totyǵy ýaqytsha eıforııa bergenimen, adam densaýlyǵyna óte qaýipti. Ol gıpoksııaǵa, júıke júıesiniń buzylýyna jáne tipti ólimge alyp kelýi múmkin, - dedi spıker.
Baqytjan Baıtılesovtyń sózinshe, qazirgi ýaqytta azot totyǵyn anyqtaýdyń negizgi tásilderi ázirlengen. Negizgi maqsat – zattyń quramyn naqty anyqtap, zertteý nátıjesiniń dáldigin qamtamasyz etý.
– Qazirgi tańda ádisteme jobasy aıaqtalyp, aýmaqtyq bólimshelerdi qajetti jabdyqtar jıyntyǵymen jaraqtandyrý máselesi sheshilip jatyr. Sonymen qatar sarapshylardy daıarlaý jáne qoldanystaǵy tizbege mamandyqtyń jańa túrlerin engizý máselesi pysyqtalýda, - dedi ol.
Aıta keteıik, Shymkent qalasynda «oıyn-saýyqqa arnalǵan gaz» satýmen aınalysqan 10 mekeme ıesi jaýapqa tartylyp, 400-den astam ballon azot totyǵy tárkilendi.
