Qazaqstanda Azııa halyqaralyq quqyq qaýymdastyǵynyń ókildigi quryldy
ASTANA. QazAqparat - M. Nárikbaev atyndaǵy KAZGıÝÝ Ýnıversıtetiniń Quqyq joǵary mektebi Azııa halyqaralyq quqyq qaýymdastyǵynyń Qazaqstandyq assotsıatsııasy mártebesine qol jetkizdi. Bul sheshim 2018 jyldyń 12 qazanynda Azııa halyqaralyq quqyq qaýymdastyǵynyń Atqarýshy keńesiniń Beıjińde ótken 19-otyrysynda qabyldandy.
Qaýymdastyqtyń Atqarýshy keńesiniń quramyna Sıngapýrdyń Ulttyq Ýnıversıteti, Úndistannyń Joǵarǵy Soty, Seýl Ulttyq Ýnıversıteti jáne basqa da tanymal joǵary oqý oryndary men halyqaralyq mekemelerdiń ókilderi kiredi.
Azııa halyqaralyq quqyq qaýymdastyǵy 2007 jyldyń sáýir aıynda halyqaralyq úkimettik emes uıym retinde quryldy. Mundaǵy maqsat Azııa men basqa da óńirlerde halyqaralyq quqyqtyq zertteýler júrgizý, azııalyq perspektıvalarǵa jaǵdaı jasaý.
Kórsetilgen maqsattarǵa qol jetkizý úshin Qaýymdastyq ulttyq assotsıatsııalardy bekite alady. Onyń mártebesi áıgili ulttyq quqyq mektebine nemese halyqaralyq quqyq zańgerleriniń ulttyq birlestigine ǵana beriledi. Qaýymdastyqtyń nebári alty ulttyq assotsıatsııasy bar. Osyǵan deıin Bangladesh, Japonııa, Iran, Ońtústik Koreıa, Nepal elderinde bolǵan assotsıatsııa endi Qazaqstanda da bekitildi.
Qaýymdastyq quramyna halyqaralyq quqyq salasyndaǵy tanymal mamandar kiredi, onyń ishinde BUU Halyqaralyq Sotynyń burynǵy sýdıasy men burynǵy tóraǵasy Hısashı Ovada, BUU Halyqaralyq Sotynyń vıtse-tóraǵasy Hantsın Sıýe, Sıngapýr Ulttyq Ýnıversıtetiniń Quqyq mektebiniń dekany, professor Saımon Chesterman bar. Qaýymdastyqtyń resmı basylymy Kembrıdj Ýnıversıtetiniń baspasy jarııalaıtyn jáne joǵary ımpakt-faktory bar Azııa halyqaralyq quqyq jýrnaly bolyp tabylady.
Aıta keterlik aqparat, KAZGıÝÝ Ýnıversıteti FIBAA-nyń halyqaralyq akkredıtatsııasynan birde-bir shartsyz ótken Qazaqstandaǵy alǵashqy jáne jalǵyz joǵary oqý orny. FIBAA sertıfıkatynyń artyqshylyǵy, túlekterdiń dıplomdary shetelde moıyndalyp, jumysqa ornalasý múmkindigi artady. Sondaı-aq olar óz oqýyn Eýropa men AQSh-ta da jalǵastyra alady.
