Qazaqstanda Azııa elderiniń saýdasy men mádenıetin qatar damytatyn qaýymdastyq quryldy
ASTANA. KAZINFORM – Astanada «Qazaqstan-Azııa saýda jáne mádenıetti damytý qaýymdastyǵy» atty zańdy tulǵalar birlestigi qurylyp, uıym tóralqasynyń alǵashqy otyrysy ótti.
Jıyn barysynda Qazaqstan Respýblıkasynyń eńbek sińirgen qaıratkeri, professor Dúısen Qaseıinov qaýymdastyqtyń tóralqa tóraǵasy bolyp saılandy.
Sondaı-aq, qaýymdastyqtyń maqsat-mindetin aıqyndaıtyn strategııalyq tujyrymdamasy bekitildi. Qaýymdastyqtyń Basqarma tóraǵasy Qanat Beısektiń aıtýynsha, bul uıym buǵan deıingi «Qazaqstan-Qytaı saýdasyna járdemdesý qaýymdastyǵynyń» tájirıbelerin eskere otyryp, aýqymyn keńeıtý baǵytynda qurylǵan.
Jańadan qurylǵan Qaýymdastyq birinshi kezekte bıznes pen iskerlik, mádenıet baǵytyndaǵy memlekettik baǵdarlamalardan bastap, jeke ujymdyq bastamalardy, bıznes pen mádenıet salasynyń suranystaryn júzege asyratyn platforma bolady. Sondaı-aq, Qazaqstan men Azııa elderi arasynda iskerlik mámilelerdi súıemeldeıtin, kásipkerlik baılanystar men birlesken mádenı halyqaralyq jobalardy júzege asyratyn «altyn kópirge» aınalýdy maqsat etedi.
«Osy «altyn kópirimizdiń» ózi úsh baǵytty qamtıdy. «saýda kópiri» - Qazaqstan men Azııa arasyndaǵy saýda-ekonomıkalyq baılanystardy nyǵaıtatyn kópir. Ony «isker adamdardyń kópiri» desek te bolady. Al «mádenıet kópiri mádenı áriptestik saıasaty tutas Azııa elderiniń mádenı-rýhanı is-sharalaryna, bastamalaryna arnalady. Úshinshi «aqyldy kópir» «ChatGPT-4» sııaqty jańa tehnologııalardy, kreatıv ındýstrııany, onlaın-bıznes mıssııalardy Qazaqstan men Azııa arasyndaǵy bıznes pen mádenı áriptestiktiń ıgiligine paıdalanýdy kózdeıdi», - deıdi Qanat Beısek.
Qaýymdastyq halyqaralyq deńgeıde Qazaqstannyń ımıdjine de atsalysyp, kórme, forým, konferentsııa, festıval túrindegi aýqymdy is-sharalardyń ótýine qoldaý kórsetedi. Osy maqsat aıasynda jyl saıyn Astanada dástúrli túrde «Bir beldeý, bir jol» halyqaralyq forýmyn ótkizý josparlanǵan. Sondaı-aq, kúlli Azııa deńgeıinde «Azııa halyqtarynyń dástúrli mýzyka festıvali» uıymdastyrylmaq. Osylaısha bul uıym Azııa qurlyǵyndaǵy tarıhy tym kóne dáýirlerden bastaý alatyn halyqtardyń dástúrli mýzyka ónerin álemge dáripteýde muryndyq bolǵaly otyr.
«Qaýymdastyq strategııasyndaǵy saýda men mádenıetti qatar alyp júrý týraly sheshim óte durys. Sebebi, kezinde Ulyq ulys – Altyn Ordanyń da, Ortalyq Azııanyń basqa da iri memleketteriniń ydyraýyna Jibek jolynyń toqtaýy óz áserin tıgizdi. Shyǵystan Batysqa sozylyp jatqan kerýen joldarynyń, saýda-sattyq pen barys-kelistiń toqtaýy alpaýyt memleketterdiń mádenı damýyn da, ekonomıkasyn da, saıası júristerin de toqyraýǵa ushyratty. Al búginge kelsek, Memleket basshysy halyqaralyq deńgeıde saýda ıntegratsııasyna, óńir elderimen, Azııa elderimen jaqyn baılanystarǵa da úlken nazar aýdaryp otyr. Senatta osy Azııa baǵyty boıynsha birneshe zań maquldanyp, Prezıdenttiń qol qoıýyna joldandy», - deıdi Darhan Qydyráli.
Sondaı-aq, ol Qazaqstan men Azııanyń birqatar eli bir-biriniń mádenı ortalyǵyn ashýǵa ýaǵdalasyp otyrǵanyn aıtty. Bul kelisim zańnama júzinde bekitilgen.
«Qaýymdastyq osyndaı jumystardyń bárin úılestirýde uıytqy bola alady», - dedi Darhan Qydyráli.
Jıynda qaýymdastyq músheleri tóralqa quramyna shet elderden de músheler tartýdy usyndy. Al qazirgi quramyna mynandaı adamdar enip otyr:
- Dúısen Qaseıinov (tóralqa tóraǵasy), Qazaqstannyń Tótenshe jáne Ókiletti elshisi, professor,
- Premer-mınıstrdiń keńesshisi Eraly Toǵjanov,
- Májilis depýtaty, Ekonomıkalyq reforma jáne óńirlik damý komıtetiniń tóraǵasy Nurtaı Sabılıanov,
- Májilis depýtaty, Halyqaralyq ister, qorǵanys jáne qaýipsizdik komıtetiniń tóraıymy Aıgúl Quspan,
- Senat depýtaty, Halyqaralyq qatynastar, qorǵanys jáne qaýipsizdik komıtetiniń hatshysy Darhan Qydyráli,
- saıasat jáne qoǵam qaıratkeri Jandarbek Kákishev,
- Saýda jáne ıntegratsııa vıtse-mınıstri Qaırat Tórebaev,
- Aýyl sharýashylyǵy vıtse-mınıstri Erbol Tasjúrekov,
- «Qazaqstan-Azııa saýda jáne mádenıetti damytý qaýymdastyǵynyń» Basqarma tóraǵasy Qanat Beısek.
