Qazaqstanda Azııa elderinen kelgen stýdentter sany TMD stýdentterinen asyp tústi

ASTANA. KAZINFORM – Qazaqstanda alǵash ret Azııadan kelgen sheteldik stýdentter sany TMD stýdentteriniń sanynan asyp tústi. Bul týraly Ǵylym jáne joǵary bilim mınıstri Saıasat Nurbek Májiliste aıtty.

– Qazaqstannyń óńirlik akademııalyq hab retinde qalyptasý úshin júıeli jumystar júrgizilip jatyr. Búginde elimizde 31 500 sheteldik stýdent oqyp júr, bul tarıhı rekord. Alǵash ret Azııadan kelgen stýdentter sany TMD stýdentteriniń sanynan asyp tústi. Bıylǵy oqý jylynda Qytaıdyń ózinen eki myńnan astam stýdent keldi. 2029 jylǵa qaraı olardyń sanyn 100 myńnan asyrýdy josparlap otyrmyz, – dedi S. Nurbek Májilistegi baıandamasynda.

Bul úshin kóptegen elde Study in Kazakhstan bilim kórmesi ótip turady. Bıyl Londonda alǵash ret Bett Show 2025 kórmesinde Qazaqstannyń ulttyq bilim pavılony usynylǵan.

Bıyl bilim kórmeleri Ulybrıtanııa, Ázerbaıjan, Pákistan jáne Qytaıda ótken. Al 2026 jyly Vetnam, Úndistan, Indonezııa, Birikken Arab Ámirligi, Qatar, Túrkııa, Mońǵolııa, Marokko jáne basqa elderde ótedi.

Mınıstrdiń aıtýynsha, qazir qyryqtan astam seriktestermen kelisim ornatylǵan. Qazaqstanda sheteldik 33 iri ýnıversıtettiń fılıaldary ashyldy. Oǵan qosa, Reseıde, Ózbekstanda, Qyrǵyzstanda jáne Tájikstanda jetekshi qazaqstandyq JOO fılıaldary qurylǵan.

Endi Qazaqstanda berilgen dıplomdardyń sol elderde tanylýy (nostrıfıkatsııa) mańyzdy bolyp otyr.

Aıta keteıik, Qazaqstanda berilgen dıplomdar Azııa-Tynyq muhıty elderinde tanylatyn boldy. Májilis depýtattary Joǵary bilim berý salasyndaǵy biliktilikti taný týraly Azııa-Tynyq muhıty óńirlik konventsııasyn ratıfıkatsııalady.

Buǵan deıin ekonomıst Saparbaı Jubaev Ózbekstan jastary úshin dıplomdy rastaý (nostrıfıkatsııa) talabyn alyp tastaý keregin aıtqan edi.