Qazaqstanda Azııa damý bankiniń jańa dırektory taǵaıyndaldy
ASTANA. KAZINFORM – Azııa damý banki Ýtsav Kýmardy Qazaqstan boıynsha jańa dırektor etip taǵaıyndady. Bul týraly atalǵan banktiń baspasóz qyzmetinen málimdeldi.
Ýtsav Kýmar bul laýazymǵa bankti 2020 jyldan beri basqaryp kelgen Narıman Manapbekovtiń ornyna keldi jáne jaqynda Azııa damý banki Ortalyq jáne Batys Azııa departamentiniń keńesshisi bolyp taǵaıyndaldy.
Azııa damý bankiniń baspasóz qyzmeti atap ótkendeı, Ýtsav Kýmar banktiń operatsııalaryna basshylyq jasaıdy, onyń Úkimetpen jáne basqa da múddeli taraptarmen qarym-qatynasyn nyǵaıtady. Sonymen qatar Azııa damý bankiniń 2023-2027 jyldarǵa arnalǵan áriptestik strategııasyn iske asyrýǵa jetekshilik etedi. Strategııa – memlekettik jáne jeke sektorlardyń ınvestıtsııalary, bilim jáne ınstıtýtsıonaldyq damý salasyndaǵy ınnovatsııalyq sheshimder esebinen turaqty jáne ınklıýzıvti ósýge qol jetkizýge kómek kórsetýge baǵyttalǵan.
«Azııa damý banki 30 jyl boıy Qazaqstannyń damý salasyndaǵy senimdi seriktesi. Men el damýynyń basymdyqtaryn qoldaý úshin bizdiń berik seriktestigimizdi nyǵaıtýdy jáne Úkimet, jeke sektor jáne basqa da múddeli taraptarmen tyǵyz jumys isteýdi asyǵa kútemin. Biz Qazaqstanǵa klımattyń ózgerýi men ekonomıkany dekarbonızatsııalaý saldaryn eńserýde, ınklıýzıvti ekonomıkalyq ósýge járdemdesýde jáne memlekettik basqarýdy nyǵaıtýda kómek kórsetýdi jalǵastyramyz», - dedi Ýtsav Kýmar.
Onyń 18 jyldyq halyqaralyq tájirıbesi bar, onyń ishinde Azııa damý bankinde 11 jyldan asa eńbek etip keledi. Qazaqstanda laýazymdy qyzmetke taǵaıyndalǵanǵa deıin ol Shrı-Lankadaǵy Azııa damý bankiniń el dırektorynyń orynbasary qyzmetin atqardy. Ý.Kýmar eldik baǵdarlamalar, bilim jáne ekonomıka boıynsha jumysty basqardy, sonymen qatar klıenttermen ózara árekettesýdiń jáne damý seriktesterin úılestirýdiń ártúrli aspektilerin basqarýǵa kómektesti.
Ýtsav Kýmar - Úndistan azamaty, AQSh-taǵy Kolledj parkinde Merılend ýnıversıtetiniń ekonomıka ǵylymdarynyń doktory jáne magıstri, Úndistandaǵy Delı ýnıversıtetiniń ekonomıka magıstri jáne bakalavry.
