Qazaqstanda azyq-túlik óndirisi 14,7%-ǵa artty
ASTANA. KAZINFORM — Tamaq ónerkásibi turaqty oń serpin kórsetip otyr. Bul týraly QR aýyl sharýashylyǵy vıtse-mınıstri Azat Sultanov málimdedi.
Ol ósim negizgi azyq-túlik ónimderiniń barlyq túrleri boıynsha baıqalatynyn atap ótti. 2025 jyldyń qorytyndysy boıynsha azyq-túlik óndirisiniń kólemi 4 trln teńgege jetip, 8,4%-ǵa artty.
2026 jyldyń birinshi jartyjyldyǵynda sala joǵary ósý qarqynyn saqtap, óndiris kólemi ótken jyldyń sáıkes kezeńimen salystyrǵanda 14,7%-ǵa ulǵaıdy.
— Agroónerkásiptik keshenniń negizgi kapıtalyna salynǵan ınvestıtsııalar kólemi de turaqty oń dınamıka kórsetip, 1,6 trln teńgege jetti, bul ótken jyldyń deńgeıinen 46%-ǵa joǵary. 2026 jyldyń birinshi jartyjyldyǵynda AÓK-tiń negizgi kapıtalyna salynǵan ınvestıtsııalar kólemi 926 mlrd teńgeni qurap, ótken jyldyń sáıkes kezeńimen salystyrǵanda 55%-ǵa artty, — dedi Azat Sultanov.
Eske sala keteıik, buǵan deıin bıylǵy jyldyń alǵashqy jartyjyldyǵynda aýyl sharýashylyǵynyń jalpy ónim kólemi 4,4%-ǵa artyp, 2,2 trln teńgeni quraǵanyn jazdyq. Ósim elimizdiń barlyq óńirinde baıqalǵan.
