Qazaqstanda azyq-túlik qaýipsizdigin qadaǵalaý erejesi jańartyldy
ASTANA.KAZINFORM – Qazaqstan Úkimeti azyq-túlik qaýipsizdigi jaǵdaıyna monıtorıng júrgizý tártibin bekitti. Tıisti qaýly 2026 jyldyń 13 qańtarynda qabyldandy.
Qujat 2010 jylǵy 12 sáýirde qabyldanǵan №296 Úkimet qaýlysyna ózgerister engizip, eldegi azyq-túlik qaýipsizdigine qatysty derekterdi jınaý men taldaý tetikterin jańartýdy kózdeıdi. Jańa erejeler alǵashqy resmı jarııalanǵan kúninen bastap on kúntizbelik kún ótken soń kúshine enedi.
Qaýlyǵa sáıkes, monıtorıng «Agroónerkásiptik keshen men aýyldyq aýmaqtardy damytýdy memlekettik retteý týraly» zań talaptaryna saı júzege asyrylady jáne mynadaı baǵyttardy qamtıdy:
- – azyq-túlik taýarlarynyń óndiris kólemi, olardyń qozǵalysy men qordaǵy naqty mólsheri;
- – áleýmettik mańyzy bar azyq-túlik taýarlarynyń baǵasy.
Azyq-túlik qaýipsizdiginiń jaı-kúıi tórt negizgi kórsetkish boıynsha baǵalanady:
- taýarlyq balans qorytyndysy negizinde áleýmettik mańyzy bar azyq-túlik taýarlarymen ishki naryqty otandyq óndiris esebinen qamtamasyz etý deńgeıi;
- azyq-túlik ónimderin óndirýshi kásiporyndardaǵy baǵa ındeksi;
- áleýmettik mańyzy bar azyq-túlik taýarlarynyń baǵa ındeksi;
- negizgi azyq-túlik taýarlary qorynyń kólemi.
Atalǵan kórsetkishterdi esepteý mindeti ártúrli memlekettik organdarǵa júktelgen. Atap aıtqanda, ishki óndiris deńgeıi men taýarlyq teńgerim agroónerkásiptik keshen jáne saýda qyzmetin retteý salasyndaǵy ýákiletti organdar tarapynan aıqyndalady. Baǵa kórsetkishteri resmı statıstıkalyq derekter negizinde qalyptastyrylsa, azyq-túlik qoryna qatysty málimetter aýdandyq jáne oblystyq deńgeıdegi jergilikti atqarýshy organdar arqyly jınalady.
Qorlar týraly derekter aýyl sharýashylyǵy kásiporyndaryndaǵy, sharýa jáne fermer qojalyqtaryndaǵy, astyq qabyldaý pýnktteri men elevatorlardaǵy, saýda oryndaryndaǵy, sondaı-aq óńirlik turaqtandyrý qorlaryndaǵy ónim kólemin qamtıdy.
Monıtorıng ýákiletti organ tarapynan memlekettik jáne jergilikti atqarýshy organdardyń derekterine súıene otyryp, sonyń ishinde naqty ýaqyt rejıminde júrgiziledi.
Jyl qorytyndysy boıynsha, úshinshi toqsannyń sońyna deıin azyq-túlik qaýipsizdigine qatysty monıtorıng nátıjeleri men memlekettik elektrondyq aqparattyq resýrstar ýákiletti organnyń resmı ınternet-resýrsynda jarııalanýǵa tıis.
Sarapshy Farhad Hasenovtyń pikirinshe, Qazaqstan azyq-túlik qaýipsizdigin nyǵaıtty. Sarapshynyń osy baǵyttaǵy oı-pikirin myna materıaldan oqı alasyz.