Qazaqstanda azyq-túlik ınflıatsııasy 8,5%-ǵa deıin tómendedi
ASTANA. KAZINFORM – 2026 jylǵy qyrkúıekte Qazaqstandaǵy jyldyq ınflıatsııa 9,3%-dy qurady. Onyń ishinde azyq-túlik taýarlarynyń baǵasy bir jylda 8,5%-ǵa ósti. Al aılyq ınflıatsııa tamyzdaǵy deńgeıde saqtalyp, 0,6% boldy.
Qyrkúıekte birqatar azyq-túlik taýary arzandady. Atap aıtqanda, pııaz baǵasy 20,7%-ǵa, lımon – 13,9%-ǵa, sábiz – 13,6%-ǵa, kartop – 13,4%-ǵa, baıaldy – 11,2%-ǵa, qyryqqabat – 10,1%-ǵa tómendedi. Sondaı-aq tátti burysh, alma, almurt, sarymsaq pen banan baǵasy tústi.
Balalar taǵamyna arnalǵan jarmalar 6,1%-ǵa, qant 1,3%-ǵa arzandady.
Jyldyq esepte de birqatar jemis-kókónis óniminiń baǵasy tómendegen. Bir jylda alma 11,1%-ǵa, lımon – 8,3%-ǵa, qyzylsha – 6,9%-ǵa, qyryqqabat – 6,1%-ǵa, banan – 5,6%-ǵa, tátti burysh 3,9%-ǵa arzandady.
Saýda jáne ıntegratsııa mınıstrliginiń málimetinshe, azyq-túlik baǵasyn turaqtandyrý úshin ishki naryqtaǵy taýar usynysyn qamtamasyz etý, ónimdi óndirýshilerden tikeleı jetkizý, artyq deldaldardy qysqartý jáne saýda ústemesin baqylaý sharalary júrgizilip jatyr.
Jyl basynan beri tikeleı jetkizý tetigi arqyly ishki naryqqa shamamen 33,2 myń tonna kartop, 13,9 myń tonna sábiz, 4,7 myń tonna pııaz jáne 177,7 tonna aq qyryqqabat jetkizilgen. Ónimderdiń negizgi bóligi Qytaı, Ózbekstan jáne óńirdegi basqa elderden ákelindi.
Sonymen qatar turaqtandyrý qorlary men «aınalym shemasy» qoldanylyp keledi. Jyl basynan beri óńirlik komıssııalardyń 816 otyrysy ótkizilip, 3 391 zańbuzýshylyq anyqtalǵan. Nátıjesinde jetkizý tizbeginen 222 ónimsiz deldal shyǵaryldy.
Áleýmettik mańyzy bar azyq-túlik taýarlaryna belgilengen 15%-dan aspaıtyn saýda ústemesin buzý derekteri boıynsha jyl basynan beri 3 610 ákimshilik qaýly shyǵarylǵan.
– Azyq-túlik baǵasyn turaqtandyrý jumysy jalǵasýda. Bul rette azyq-túlik ınflıatsııasyna barynsha áser etetin negizgi taýarlarǵa jáne ishki naryqty qajetti ónimdermen turaqty ári úzdiksiz qamtamasyz etýge basymdyq berilýde, – delingen mınıstrlik habarlamasynda.
Budan bólek, maýsymnan bastap áleýmettik mańyzy bar azyq-túlik taýarlaryn, sondaı-aq un tartý jáne nan pisirý kásiporyndaryna arnalǵan bıdaıdy temirjolmen tasymaldaýǵa tómendetilgen koeffıtsıent qoldanylady. Bul tasymaldaý qunyn 40%-ǵa deıin azaıtýǵa múmkindik beredi.
Aıta keteıik, tamyz aıynda Qazaqstandaǵy jyldyq ınflıatsııa 9,8%-dy, al azyq-túlik ınflıatsııasy 9,5%-dy quraǵan edi. Osylaısha qyrkúıekte eki kórsetkish te tómendedi.
