Qazaqstanda azyq-túlik baǵasy bir aptada qalaı ózgerdi
ASTANA. KAZINFORM — Qazaqstanda áleýmettik mańyzy bar azyq-túlik taýarlarynyń baǵasy tómendeı bastady. Ulttyq statıstıka bıýrosynyń málimetinshe, 2026 jyldyń 24 maýsymy men 1 shildesi aralyǵynda ÁMAT-tyń baǵa ındeksi 99,9% bolyp, aptalyq deflıatsııa tirkeldi.
Aldyńǵy aptada jeti túrli azyq-túlik taýary arzandady. Eń kóp tómendeý qyzanaqta baıqalyp, onyń baǵasy 8,5% tústi. Qııar 8,3%, jumyrtqa 1,5%, alma 1,1%, jańa aýlanǵan, salqyndatylǵan jáne muzdatylǵan balyq 0,4%, kúnbaǵys maıy 0,2%, al aıran 0,1% arzandady. Al kúrish, nan jáne sút baǵasy ózgerissiz qaldy.
Sonymen qatar 21 túrli taýardyń baǵasy ósti. Eń joǵary ósim qyryqqabatta tirkelip, ol 7,9%-ǵa qymbattady. Pııaz ben kartop 1,9%-ǵa, qant 1,6% ósti. Qalǵan ónimder boıynsha ósim 1%-dan aspady.
Óńirler boıynsha alǵanda, baǵanyń ósýi tórt óńirde baıqaldy. Aqmola oblysynda baǵa 0,2%, Atyraý, Almaty jáne Soltústik Qazaqstan oblystarynda 0,1% kóterildi. Al Astana men Almaty qalalarynda, sondaı-aq Qaraǵandy jáne Jambyl oblystarynda baǵa deńgeıi turaqty boldy.
Baǵanyń tómendeýi 12 óńirde tirkeldi. Eń úlken tómendeý Qyzylorda oblysynda baıqalyp, baǵa 0,9% azaıdy. Aqtóbe, Ulytaý, Qostanaı jáne Túrkistan oblystarynda kórsetkish 0,3%, Mańǵystaý, Batys Qazaqstan jáne Shyǵys Qazaqstan oblystarynda 0,2%, al Shymkent qalasy, Pavlodar, Abaı jáne Jetisý oblystarynda 0,1% tómendedi.
Saýda jáne ıntegratsııa mınıstrligi múddeli memlekettik organdarmen birlesip, ishki naryqtaǵy baǵa turaqtylyǵyn qamtamasyz etý jumystaryn jalǵastyryp jatqanyn málimdedi.
— Jyl basynan beri óńirlik komıssııalardyń 581 otyrysy ótkizilip, saýda ústemesiniń shekti mólsherin asyrǵany úshin 2 434 ákimshilik qaýly shyǵarylǵan. Sondaı-aq 26,5 myńnan astam taýar ótkizý tizbegi tekserilip, zań talaptarynyń buzylýyna baılanysty 3 816 táýekel anyqtalǵan, — delingen habarlamada.
Eske salaıyq, buǵan deıin Qazaqstanda áleýmettik mańyzy bar azyq-túlik taýarlary baǵasynyń ósý qarqyny ótken jylmen salystyrǵanda tórt ese baıaýlap, 18 maýsymdaǵy málimet boıynsha ındeks 7,3 paıyzdan 1,8 paıyzǵa deıin tómendegenin jazǵanbyz.
