Qazaqstanda ajyrasý deńgeıin 25% azaıtý kózdelip otyr

ASTANA. QazAqparat - Qoǵamdyq damý mınıstrligi Qazaqstandaǵy ajyrasý deńgeıin 2030 jylǵa deıin 25 paıyzǵa deıin azaıtýdy josparlap otyr, dep habarlaıdy QazAqparat.

Búgin Qazaqstan Respýblıkasynyń Memlekettik hatshysy Gúlshara Ábdiqalyqovanyń jetekshiligimen Qazaqstan Respýblıkasy Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń kezekti otyrysy ótti.  

Qazaqstan  Respýblıkasy Qoǵamdyq damý mınıstrliginiń málimetinshe, Memleket basshysynyń tapsyrmasyn oryndaý  maqsatynda otbasy saıasaty jáne múddeli memlekettik organdar salasyndaǵy sarapshylardyń usynystary negizinde 2019-2024 jyldarǵa arnalǵan otbasyn damytý jáne qoldaý Jol kartasynyń jobasy ázirlendi. Jol kartasy otbasyn qurýdyń barlyq kezeńderinde keshendi vedomstvoaralyq jumysty qamtamasyz etedi: nekege turý týraly ótinish bergen sátten bastap, bala týý kezeńinde de qoldaý kórsetý, otbasyndaǵy daǵdarys jaǵdaılary jáne erli-zaıyptylarmen ajyrasý satysynda tatýlastyrý máseleleri qarastyrylǵan.

«Jol kartasy» is-sharalary arqyly ajyrasý kólemin 2019 jyly  41% -dan 38,2% -ǵa deıin, 2023 jylǵa qaraı 30% -ǵa, 2030 jylǵa qaraı 25%-ǵa deıin tómendetý josparlanýda. Jol kartasyn ázirleýshiler ajyrasýlardyń aldyn-alýdyń negizgi mehanızmi retinde otbasylyq sottar janynda ajyrasýdyń aıtarlyqtaı kóp Qazaqstandaǵy segiz óńirinde otbasylyq resýrstardy qoldaý ortalyqtaryn qurýdy usynýda» delingen vedomstvo taratqan habarlamada. 

Esterińizge sala keteıik, 2018 jyldyń 31 qazanynda Qazaqstan Prezıdenti Qazaqstandaǵy ajyrasýdy azaıtý jóninde sharalar qabyldaýdy tapsyrǵan bolatyn. Sońǵy 10 jylda Qazaqstanda 1,5 mıllıonǵa jýyq ajyrasý faktisi tirkelgen. Ár jyl saıyn árbir úshinshi neke buzylady.